MAAYO nalang unta kun mahinayon ang planong Davao railway project, lagmit makubsan gamay ang problema sa trapiko sa umaabot nga mga panahon.
Niining kasamtangan, guot na kaayo ang sitwasyon sa trapiko sa Davao City. Dili na kini iglayo sa sitwasyon sa kadalanan sa Metro Manila ug sa Cebu City.
Samutan pa ang kaguot sa dagan sa trapiko ning dakbayan gumikan sa gipahigayong mga road constructions ug cable installations nga ang naapektuhan ang mga nag-unang mga kadalanan.
Kining tanan kabahin lamang sa paglambo sa usa ka siyudad, pero kun dunay paspas nga paglambo unta paspas sab ang plano kun unsay makaalibyo sa problema.
Sa bahin sa City Transport and Traffic Management Office (CTTMO) nga bisan sa ilang mga gihimo nga experimental basis sa traffic flow, dili gyud kini mosalir, mosamot na hinuon ang problema kay daghan ang makulgot nga sakyanan, daghan ang malangan.
Gani ang siyudad sa nakalabay nga Agosto ni-implementar niining High-Priority Bus System (HPBS) project, nagpadagan og mga bus sa siyudad aron makubsan ang problema sa trapiko, apan karon, daw mao lang man gihapon ang sitwasyon.
Unta kun dunay mga ingon niini nga plano ang gobyerno sa usa ka malambuon nga siyudad sama sa Davao City, padak-an una ang mga kadalanan, mohimo’g mga skyways, ug mahitabo ang planong Davao railway project aron masulosyonan ang problema.
Sa laktud, dako ang paglaum sa Dabawenyo nga mahatagan og kasulbaran ang problema sa trapiko ning siyudad sa hinanaling panahon.