GIKABSAN sa kinabuhi ang supervisor sa dakong kompaniya human gibanhigan alas 6:45 sa buntag Sabado, Oktubre 5, sa probinsiya sa Maguindanao.
Giila ang biktima nga si Jun Balboa, 44, minyo, supervisor sa motorpool sa Lamsan Trading sa Barangay Simuay, Sultan Kudarat ug nagpuyo sa Barangay Baguer, Pigcawayan, North Cotabato.
Sa taho gikan sa kapulisan sa Sultan Kudarat Municipal Police Station, nasayran nga sakay ang biktima sa iyang motorsiklo gikan sa balay niini ug padung na unta sa trabaho sa dihang nahitabo ang pagpamusil.
Sumala pa nga pag-abot sa biktima sa may Barangay Alamada, Sultan Kudarat kalit lang niabot ang duha ka wala mailhing suspek ug nagpusil kaniya.
Nahagba ang biktima sa gisakyan niyang motor daplin sa national highway ug naligo sa kaugalingong dugo.
Abtik sab nga miikyas ang mga suspetsado sakay sa laing motor paingon sa hilit nga dapit sa Sultan Kudarat.
Patay diha-diha si Balboa nga naigo sa ulo, aping ug likod nga bahin sa lawas.
Sigon sa pamilya nga sa wala pa nahitabo ang pagpatay, nakahisgot ang biktima nga dunay nanghulga sa iyang kinabuhi nga posibleng dunay kalabutan sa iyang trabaho.
Imbestigasyon gilusad sa kapulisan Sultan Kudarat Municipal Police Station sa insidente.