USA ka lalaki gisikop human nasakpang nagyup-yop og marijuana didto sa dakbayan sa Tagum.
Ang dinakpan nailhan nga si Rene Reponte, 20, ug molupyo sa Purok 7, Barangay Sagayen, lungsod sa Asuncion, Davao del Norte.
Sa report gikan sa Tagum City Police Station nasayran nga pasado alas 11:10 sa gabii niadtong Dominggo, nasikop sa mga otoridad ang suspek didto sa may Tagum Public Market.
Usa ka Barangay Police sa may Barangay Magugpo West nga si William del Cerna ang nakasakop sa suspek.
Naaktuhan si Reponte samtang nagyup-yop og marijuana sa nahisgutang dapit.
Nakuha sa posisyon sa dinakpan ang usa ka stick sa nilikit nga papel nga dunay sulod nga dahon sa gituohang marijuana.
Sa dihang gikapkapan nasakmit sab gikan sa suspek ang usa ka rolyo nga dahon sa gituohang marijuana nga dunay gibug-aton nga kapin 4.75 gramos.
Ang suspek gitanggong dayon sa selda samtang giimbestigahan sa kapulisan.
Kasong paglapas sa Republic Act 9165 kon Comprehensive Dangerous Drug Acts ang gihikay sa kapulisan batok sa suspek. (Marvin Pineda)