NINGBANGON gikan sa 28 puntos nga pagkalubong ang NLEX Road Warriors aron pakagingon ang Brgy. Ginebra Gin Kings pinaagi sa overtime, 113-111, niadtong Sabado sa gabii sa out-of-the-country nga kombati sa Philippine Basketball Association (PBA) Governor’s Cup conference sa Coca Cola Arena sa Dubai.
Ang three-point bomb ni Jerico Cruz sa nahabiling 20 ka mga segundos sa overtime maoy nagpadaog sa NLEX.
Ang Gin Kings sayo untang nakapabulhot sa ilang opensa ug niabot na sa 28 puntos ang ilang labaw sa 2nd quarter.
Apan hinayhinay nga ninggukod ang Road Warriors hangtod nga nakapugos sila og overtime pinaagi sa buzzer-beater three-point shot ni Keifer Ravena.
Sa kadaugan, nainat sa Road Warriors ang ilang rekord ngadto sa 4-1 nga nagpasaka og balik sa ilang moral alang sa pagpadayon sa ilang kampanya sa season-ending nga komperensiya.
Gipangulohan ni import Olu Ashaolu ang Road Warriors pinaagi sa iyang 25 puntos, nidugang og 21 puntos si JP Erram samtang nitunol og 20 puntos si Philip Paniamogan.
Ang Gin Kings, nga nahagbong sa 1-2 nga rekord, gipangulohan sa ilang import Justin Brownlee, kinsa mirehistro og triple-double 42 puntos, 20 rebounds, ug 10 assists.
Nidugang og 19 puntos matag usa sila si Greg Slaughter ug Stanley Pringle alang sa Gin Kings.
Puntos matag usa:
NLEX Road Warriors (113) – Ashaolu 25, Erram 21, Paniamogan 20, Cruz 13, Ravena 13, Quinahan 9, Ighalo 5, Varilla 3, Galanza 2, Fonacier 2.
Barangay Ginebra (111) – Brownlee 42, Slaughter 19, Pringle 19, Tenorio 12, J. Aguilar 9, Caguioa 4, Dela Cruz 4, Thompson 2. (ESL)