GI-KNOCKOUT sa ikaunom ka round si kanhi world champion Milan Melindo sa undefeated fighter Japanese fighter Junto Nakatani sa ilang 10-round superflyweight fight didto sa Korakuen Hall sa Tokyo, Japan niadtong Biyernes sa gabii.
Kini maoy ikatulong sunodsunod nga kapildihan sa 31-anyos nga si Melindo nga naghulagway sa pagsawop sa iyang boxing career.
Ginamit ang bintaha sa gitas-on ni Nakatani, way departamento nga gidag-an si Melindo kinsa perming masungag sa jab sa 21-anyos nga walhon.
Sa ikaupat nga round, nahilam-os sa saktong kombinasyon si Melindo nga gipauwanan sa mga kinumo sa Hapon.
Sa sunod nga mga round nagpadayon ang kabangis ni Nakatani ug hangtod nga giundang ni referee Yuji Fukuchi ang away sa katapusang 2:02 sa ikaunom nga round aron malikayan ang dakong kadaut ni Milendo kansang professional record mipatighug ngadto sa 37-5-0, 13 nga baraha.
Si Nakatani, sa iyang bahin, nipausbaw sa 20-0 nga record.
Kon kahinumdoman, nalangkat ni Melindo ang IBF Interim light flyweight title human sa iyang kadaugan batok ni Fahlan Sakkreerin, Jr. niadtong Nobiyembre, 2016 sa Cebu.
Nahimo siyang regular world champion pinaagi sa papakaging sa Haponanon nga si Akira Yaegashi sa Mayo 21, 2017.
Iya kining nadepensaan batok ni Hekkie Budler sa South Africa sa Cebu sa Septiyembre 16, 2017 apan, napildi siya ni Ryoichi Taguchi sa IBF/WBA light flyweight unification sa Dec. 31, 2017 sa Tokyo. (JBM)