MIPABAHA og 22 puntos si Anthony Davis, gawas sa iyang 10 ka rebounds sa iyang unang NBA preseason game ubos sa Los Angeles Lakers sa dihang ilang gilubong ang Golden State Warriors, 123-101, kagahapon didto sa bag-ong homecourt sa Warriors - ang Chase Center - sa San Francisco.
Si Davis kinsa nakuha sa Lakers gikan sa New Orleans Pelicans sa offseason, nakigkumboya ni LeBron James ug Javale McGee aron paghatag og bati nga lihi sa Warriors diha sa kaugalingong korte niini nga bag-o lang giablihan.
Midugang si James og 15 puntos human kini nakighugpong ni Davis sa pagpahagsa og 11-0 nga rally aron kuliton ang 33-20 nga labaw human sa first quarter.
Hinuon sa second quarter, mihinayhinay og kahait ang opensa sa Warriors ug natibhangan ngadto sa nuebe puntos ang labaw sa Lakers.
Apan ang panaghugpong nila ni Davis ug LeBron James maoy mitibawas sa ilang paglaom.
Si Stephen Curry kansang unang itsa gikan sa three-point area igo lang na airball, mitapos sa duwa nga may 18 puntos, samtang si Draymond Green nasipyat sa iyang tulo ka itsa sa three-point area, apan aduna kini pito ka rebounds ug upat ka assists.
Ang kanhi Laker nga si D’Angelo Russel, sa iyang unang adlaw isip sakop sa Warriors igo lang usab naka kuwatro puntos.
Gawas sa iyang puntos, si Davis milangkat og siyam ka rebounds samtang si James adunay walo ka assists ug upat ka rebounds.
Nakatampo usab og 14 puntos si Troy Daniels ug 10 ang naamot ni Alex Caruso 10. Hinuon wala na paduwaa sa second half sila si James ug Davis.
Sa laing preseason game, gikulata sa Orlando Magic ang San Antonio Spurs, 125-89. (JBM)