SUPERBALITA CEBU

Nadela: Pagpalambo sa pamoksing sa Sugbo

GOOD news alang sa mga batan-on nga nangandoy nga mahimong malampusong boksidor ugma damlag. Gipahibalo ko ni Brix Flores anak sa tinamod nga boxing trainer nga si Noy Pacing Flores, bukas na alang sa mga batan-on ang Pacing Flores Boxing Academy. Kini naa mahimutang sa Barangay Alang-alang sa siyudad sa Mandaue.

Si Noy Pacing nitaliwan niadtong tuig 2004, apan ang iyang pangalan nikulit na og luna sa kalibutan sa pamoksing dinhi sa Sugbo isip hanas og utokan nga trainer sa iyang panahon. Tuig 1977 nagsugod ang iyang pagka trainer. Nilampos siya pagbansay bansay sa magsuong Ronald ug Arlo Chavez og nahimong mga Olympian.

Ang magsuong Edito ug Edmund Villamor siya ang unang nagbaid kanila isip mga malamposong boksidor. Kinsay makalimot nila ni Noel ug Malcom Tuñacao, Randy Suico, Rev Santillan, Yukka Gejon, Dexter Delada, Wendell Janiola ug Rodel Mayol.

Silang tanan pulos nagkat-on sa pamoksing pinaagi ni Noy Pacing. Isip ring announcer kaniadto sa amateur ug professional boxing saksi ko sa didikasyon nga gipakita ni Noy Pacing sa iyang gugma sa pamoksing. Mao nga ang iyang anak nga si Crisologo nga mas nailhan sa pangalan nga Brix madasigon nga mopadayon sa nasugdan sa iyang amahan.

Si Brix nga usa ka kanhi Olympian, namupo sab og daghang gold, bronze ug silver medal sa iyang panahon isip amateur boxer. Gold medalist sa 1983 Palarong Pambansa. Bronze medalist siya sa 1985 Asian Boxing Championship ug Seoul Asian Games Sa mao gihapong tuig nakasakmit siya og gold medal sa Sunshine State Games nga gipahigayon sa Tampa, Florida USA. Unya gold medalist sa National Open Boxing Championship gikan sa tuig 1985, 87 ug 88. Isip eskolar gitapos niya ang kursong Bachelor of Science in Physical Education sa Southwestern University.

Basi sa mga kalampusan nga iyang nakab-ot isip boksidor og sa abag sa iyang asawa nga si Joselyn , nahimugso ang Pacing Flores Boxing Academy. Iyang tumong ug tuyo mao ang pag-umol og mga dekalidad nga mga boksidor.

Sa pagkakaron, trese ka mga batan-ong boksidor nga naglakip sa usa ka babaye ang gibansay bansay ni Brix. Sila mao si John Eronico ug Fredrich Locsin sa timbang nga 28 kilograms. Steven Bernales, 34 kgs. Kyhl Sumalinog, 36 kgs. Rammel Manguilimotan ug Sherwin Dacullo 40 kgs. Jobert Dacullo 44 kgs. Jesriel Bonghanoy ug Eduard Serrano 46 kgs. Kevin Sumalinog 48 kgs. Cerilo Dacullo 52 kgs. Virgel Serrano 62 kgs. Ug ang bugtong babayeng boksidor mao si Patrecia Sumalinog. Kulang pa ang maong gidaghanon.

Nagtuo si Brix nga daghang mga batan-on dinhi sa Sugbo ang adunay potensiyal nga mahimong malampusong boksidor. Basi sa kasinatian kinsa man guy magtoo sa naabtan sa daghang boksidor dinhi sa ato ang nikulit og pangalan. Di hinuon ikalimod nga daghan sab sa mga ginikanan ang nahimong babag sa tinguha sa ilang mga anak tungod sa paghulagway sa uban nga ang boksing brutal nga matang sa paugnat-sakusog. Tukmang pagbansay ug teknik inibanan sa paggiya sa iyang trainer, malikayan kining maong pagtuo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph