DUNAY nabalaka nga moulbo ang panagbangi tali ni Mayor Edgardo Labella ug ni Vice Mayor Mike Rama sa dihang giluwatan sa mayor ang Executive Order (EO) 18 niadtong Agusto 23, 2019 nga nagmugna sa.Cebu City Sinulog Governing Board (CCSGB).
Ubos sa EO 18, ang maong hunta mao na ang mag-organisar sa Sinulog Festival. Ang hunta mao usab ang makig-coordinate sa ubang mga ahensiya sa kagamhanan bahin sa kahapsay ug kalinaw.
Sa unang tan-aw, ingon sa gipiangan sa EO 18 ang Sinulog Foundation Inc. (SFI) nga dugay nang gipangulohan ni Rama ug gitukod niadtong 1984 aron maoy mag-organisar sa tanang kalihokan sa Sinulog ug aron di kini masaglan sa politika.
***
Apan sa ulahing pamahayag gikan sa Cebu ity Hall, gitugyan na ni Labella ang pag-organisar sa Sinulog 2020 ngadto sa SFI. Si Cebu City Administrator Floro Casas Jr. niingon nga ang SFI di na magsalig sa CCSGB sa ilang operasyon.
Sa laktod, ang pagbuot sa SFI maoy tumanon bahin sa pag-organisar sa Sinulog 2020. Sa maong pamahayag, ingon sa gisabyagan sa mayor og bugnaw nga tubig ang bisan unsang nag-alintabo nga kainit sa wa makauyon sa EO 18, kon duna man gani.
Usa sa mga nipadayag sa kabalaka sa pagmugna sa CCSGB mao si kanhi Cebu Customs Collector David Odilao Jr., ang amahan sa Sinulog. Apan karon, matod pa ni Atty. Casas, ang CCSGB na ang makig-coordinate sa SFI sa mga kalihokan sa Sinulog.
***
Apan naa gihapon ang CCSGB alang sa transparency, sa cuentas claras, sa gasto sa mga kalihokan sa Sinulog. Ang City Hall ug Kapiltolyo maghatagan og subsidy nga P25 milyones ngadto sa P30 milyones ngadto sa SFI alang sa Sinulog Festival matag tuig.
Daghang dagkong personalidad nga gitudlo ni Mayor Labella sa CCSGB, lakip na ni Odilao ug Gov. Gwen Garcia. Makapaabot kita sa malapusong Sinulog Festival sa 2020.
Wa untay EO 18 kon mopagawas ang SFI og financial report human sa Sinulog. Unsa ka tinuod nga ang subsidy sa City Hall ug Kapitolyo diretso madawat sa mga nakadaog sa Sinulog, di na moagi sa SFI?