NAGPADAYON ang pagpangguba sa mga maayo pang aspaltadong kadalanan sa dakbayan sa Sugbo ug gipangsemento kini. Maayong pero mag-unsa ang nindot nga dan ko walay kanal o tukma nga sistema sa agianan sa tubig? Madaut gihapon kini sa dagan sa panahon.
Wala ba makakita o masayod ang mga hingtungdang opisyal sa dakbayan ug public works nga ang daling mobaha o lunop sa pagbunok sa uwan maoy usa sa nag-unang problema karon? Ug dugang pa, ang ilang gipangguba nga dan dili pa gyud daut apan, dunay napalusot nang budget sa pagguba?
Ngano nga ang ubang libaong kaayong dalan sa suok nga bahin sa dakbayan wala matagad? Tungod kay dili makita sa publiko nga sila nagtrabaho kunohay Mao kini mahitabo sa proyekto nga dunay lama sa pamulitika.
Apan ang mga batid sa Department of Public Works and Highways (DPWH) gipalabot nga mohatag unta og saktong tambag ug komento sa tukma nga proseso sa pagpatuman sa proyekto sa kadalanan. Basta may budget, hala guba lang sad. Eksperto sa buringog.
Ug kon moabot ang budget sa kanal, binuknokay na sad sa dan nga sementado? Dugang gasto. Hago ug komplikado. Bisan ang mga tinun-an sa enenyero nagkanayon nga unahon ang paghimo sa kanal o drainage system kaysa dan.
Hinuon, wala kitay mapaabot sa naasoy nga ahensiya. Pwera sa pipila nga maayo, mismo si Presidente Rodrigo Duterte naila sa ahensiya nga usa sa mga labing kurakot sa kagamhanan. Nakagamot na ang dunot nga burukrasya. Mao nga imbes mosanta sa mga politiko, makapangutana kita, nahimo na hinuong kakunsabo?
Atong panawagan sa mga hingtungdang opisyal sa public works ug kagamhanan sa dakbayan, palihog unaha intawon pag-atiman ang kanal. Maayong aspaltadong dan, ayaw una bungkaga. Nakapadugang kini sa balda sa trapiko.