USA ka sakop sa Citizen Armed Forces Geographical Unit (Cafgu) ang nakaikyas sa kamatayon gikan sa mga sakop sa New People’s Army (NPA) didto sa Sitio Imburnal, Barangay Sta. Cruz, Laak, Compostela Valley Province sa alas 8:00 sa buntag niadtong Lunes.
Si Willingtonn Ginabe, hamtong ang pangidaron, giingon nga igo lang nag-atiman sa iyang uma dihang duha ka mga armadong tawo ang miduol kaniya dayon gipusil gamit ang .45 kalibre nga pistola.
Base sa taho nga nadawat sa militar, si Ginabe nakahimo sa pagdagan paingon ngadto sa iyang balay ug nakaikyas sa sunod-sunod nga buto sa armas.
Ang asawa ni Ginabe kinsa nakasaksi sa maong insidente nagbutyag nga tulo ka mga tawo ang miduol sa iyang bana. Ang ikatulo nga tawo giingon nga nagbitbit og taas nga kalibre sa armas mga 100 metros ang gilay-on gikan sa nahimutangan sa duha ka mga rebelde.
Si Major General Carlos Holganza, commanding officer sa 10th Infantry Division, nagpasalamat nga wala milampos ang tinguha sa mga rebelde nga buot mopatay sa walay armas nga sakop sa militar.
Siya nagsulti nga ang gihimo sa mga rebelde nagpamatuod nga wala silay kahadlok sa Diyos.
"We thank God for protecting Ginabe and may God always protect our troops who are at the forefront in the fight against threats to national development. This attempt on the life of one unarmed Cafgu shows the real color of the communists.
They do not respect human rights and they do not in any way respect people," ni Holganza.
Sa miaging semana, suma sa maong opisyal, gipatay sa mga rebelde ang usa ka Cafgu nga si Albino Pablo, 44, amahan sa unom ka anak, gipatay atubangan sa iyang asawa.
"Like Ginabe the assault happened while he was tending their farm but Pablo was not as lucky as Ginabe. Also in February, another Cafgu and at the same time habal-habal driver, Florentino Mamuag Jr., of Davao City was murdered as he was about to go home.
Both were unarmed when murdered," ni Holganza. (AD)