ANG Daniel R. Aguinaldo National High School (Dranhs) nanimawos human mapildi sa unang duwa, ug gibugha ang Holy Cross of Davao College (HCDC) Bajada-Titong James, 12-4, sa pagsugod sa Samahang Basketbol ng Pilipinas (SBP) 3x3 regional eliminations sa Rizal Memorial Colleges (RMC) Petro Gazz Arena, Davao City, Sabado sa buntag, Oktubre 5, 2019.
Ang kadaugan sa Dranhs misegunda human siya napildi, 8-10 via overtime kontra Ateneo de Davao University (Addu) Lady Blue Knights sa naunang duwa.
Si Dranhs team captain Aleah Kaye Clapano, sa post-game interview sa SunStar Davao, namahayag nga ang kapildihan nila sa Ateneo ang wa damha.
“Daug naman unta jud to, nag overtime pajud. Tong sa extension, wala man hinuon mi nagpanic wala lang nabantayan tong nagshoot sa Ateneo."
Si Addu’s Kate Buenaventura miiskor sa free throw nga mibitbit sa kadaugan sa girls bracket A.
Ni Buenaventura, “I felt the pressure to score since the team who makes the first two points in the overtime will win. But I managed to calm down and delivered.”
Ang Dranhs mao ang 2017 SBP 3x3 national finals girls division third placer.
Si Addu coach Cyrielle Ramintas nga di sila mokumpiyansa sa sunod duwa kontra Mati ug HCDC Bajada.
Ang SBP-Davao Region operations head nagkanayon nga ang top two teams sa matag bracket mo-abante sa quarterfinals.
Sa laing duwa, ang Agusan del Sur mipildi sa Bernardo Carpio National High School (BCNHS), 10-9; Mati City mipukan sa HCDC Bajada, 7-4; Assumption College of Davao (ACD) mipatikangkang sa Barangay Sto. Nino, 12-3; ang HCDC Salvador midaug kontra Zillovia National High School sa Agusan del Sur, 11-2; Crossing Bayabas National High School (CBNHS) milubong sa Barangay 76-A, 9-5; ug Davao City National High School (DCNHS) milampurnas sa Cabantian National High School, 6-4.
Samtang ang Philippine Academy of Sakya mipildi sa Holy Child College of Davao (HCCD) Main, 8-7, ug ang Addu Blue Knights mipayukbo sa Dranhs, 20-14, sa boys division.
Ang Philippine Women’s College (PWC), mipayukbo sab sa SCT-Agusan Sur, 7-5; St. Mary’s College of Tagum (SMC) mipildi sa Talomo Proper, 10-8; Philippine Nikkei Jin Kai International School (PNJKIS) midaug kontra HCCD Mintal, 7-3; Cor Jesu College of Digos mitameme sa RMC Bulldogs, 16-9; ug Davao del Sur mibasura sa Cabantian NHS, 12-3.
Ang mokampeyon nga tim modawat og all-expense paid trip sa SBP 3x3 national finals berths sa Manila.