DEMORALISADO na ang kalihokan karon sa Philippine National Police (PNP) tungod kay dili na basta basta ang nalambigit sa pag-recycle sa ginadili nga droga.
Kini gumikan kay kaniadto mga botitingoy lamang og ranggo ang iplantada nga maoy responsable niini, ug dali ra kaayo silang hinganlan sa publiko.
Karon, nagsugod kang PNP director general Oscar Albayalde, pikon na ang heneral halos dili na gustong magpa-interbyu sa mga sakop sa media, ngano ka ha? Tungod ba kay wala na siya'y ikatubag?
Sa atong panglantaw, ang gikalagutan pag-ayo ni PNP chief Albayalde kay iyang namatikdan nga halos dili na mutuo ang mga tawo sa bisan og unsa ang iyang ipangatarungan sa padayon nga imbestigasyon karon sa Senate Blue Ribbon Committee.
Kangil-ad na sa imahe sa atong kapulisan karong panahona, wala man nato kini hidunggi niadtong gihiusa pa ang Philippine Constabulary Integrated National Police (PCINP), karon hinuon nga doblado na ang ilang sweldo mas dako paman hinuon ang ilang kita sa pag sindikato kaysa ilang sweldo?
Karon lang nato namatikdan nga matag heneral, adunay kaugalingon nga mga sakop sama niining trese ka pulis nga gihinganlan karon nga pulos mga bata-bata ni Albayalde sa dihang provincial director pa siya sa Region 3, sa Pampanga, hangtud karon nagpabilin nga iyang gigamit sa pagsindikato sa pagpangdakop niadtong big time nga sindikato sa ginadili nga droga.
Unya karon, siya ang mangulo sa pagdakop ug unya pistahan dayon sa mga sakop sa mga tigbalita, ug diha-diha i-promote dayon ang iyang ranggo.
Samtang ang mga nasikop nga binulto nga droga, mga sindikato nga ilang mga bata-bata kinsa maoy magbaligya pag-usab ug kuwartahan na bisan naa pa sa serbisyo ug duna nay Sport utility vehicle (SUV) nga sakyanan nga milyon-milyon ang kantidad.
Hayahay ang mag-pulis nu? Kay wamay pulis nga modakop sa mga pulis kay sa pagtuo nila sila maoy tag-iya sa balaod. Pero dunay karma, matud pa sa sinultihan sa uban, moabot ang gaba nga dili magsaba, ug si PNP chief Albayalde maoy nahimong susi sa gipangbuhat sa mga de-ranggong opisyal sa atong kapulisan karon.
Ang PNP general imbestigahan, mao kini ang mando karon ni Presidente Rodrigo Duterte, dili lang si Albayalde kun di kadtong mga heneral nga nahimong director sa atong kapulisan sa milabay nga panahon. Aguy Noy.
Pagkadaghan raba diha nga wala pa mi-retiro sa ilang serbisyo pero, duna na’y mga dagkong palasyo, duna na’y mga dagkong yuta nga napalit, mga negusyo. Motuo unta ta niini kung nag-retiro na sila, kay duna ma’y milyon-milyon nga retirement ang ilang madawat? Pero active pa sa serbisyo may mga kabtangan naman nga nalantad karong panahona?
Manghinaut kita nga di pugngan sa atong presidente ang pagbutyag sa mga police generals nga maoy utok sa Ninja Cops.
Atong atangan kini. Hinaut sab unta nga kon duna may droga nga makasulod sa tong nasud, dauban atubangan sa publiko aron dili magdudahan sa tawo, ug wala nay ma-recycle ang mga kurap nga pulis.