IGACOS, Davao del Norte - Nag-agulo sa kasakit ang usa ka lalaki nga nasamdan human gidunggab sa nakabanging kasugal sa duwa nga baraha sa Sitio 14, Barangay Tagbaobo, Kaputian District, Island Garden City of Samal (Igacos) alas 12:45 sa kaadlawon, Sabado, Oktubre 5.
Ang biktima giila nga si Christopher Abing, samtang ang suspek nailhang si Lowell Jay Estenoso, parehong molupyo sa nahisgutang dapit.
Sa inisyal nga imbestigasyon sa IGACOS PNP nasayran nga ang suspek ug ang biktima nagsugal og baraha samtang mitambong sa lamay sa silingan.
Giingong nahitabo ang lalis tali sa duha dihang napildi sa sugal ang biktima ug misangko sa pagpanunggab sa suspek gamit ang kutsilyo diin naigo sa ilok ang biktima.
Anaa na sa luwas nga kahimtang ang biktima samtang ang suspek tingkagol sa prisohan sa Igacos PNP. (Dexter T. Visitacion)