NAALARMA karon ang ubang indibidwal sa dakbayan sa Digos nga mabiktima sa giingong “Bunal Squad” nga naglatagaw panahon sa kagabhion sakay sa motorsiklo basin unya magpataka nalang sila og pamunal.
Apan daghan nga taga Davao del Sur ang giingong pabor niini labi nga mihangyo nga apilon og bunal kining mga palahubog nga mouli nga magsusapinday sa kahubog diha sa kalsada.
Usa sa hinungdan nga maoy awayan sa magtiayon dihang mouli nga hubog ang bana, busa alang kang Garcia Emi, taga Digos City nga apilon nalang sab unta sa Bunal Squad og bunal kining mga palahubog.
Una niini, nag-viral sa social media human nakuhaan sa closed-circuit television (CCTV) footage ang upat ka mga nag-motorsiklo nga giingong sakop sa Bunal Squad human nagbitbit kini og pising pamunal samtang gitaptapan og panyo ang nawong.
Sumala sa tindera og gulay nga si Helen, 45-anyos, nabalaka siya nga magpataka ang mga suspek og pamunal panahon sa kagabhion mao nga giawhag niini ang kapolisan nga mohimo og lakang aron masikop ang mga suspek.
Apan, nabalaka sab ang ginang nga basin unya gipaluyuhan sa gobyerno ang maong grupo.
Gumikan niini, ne-menos sab ang mga menor de edad nga naglatagaw panahon sa kagabhion.
Miani sab og nagkadaiyang reaksyon sa mga netizens ang gihimo sa maong grupo human aduna’y nipabor apan mas daghan sab ang mialma.
Apan, nabalaka sab ang usa ka Silver Gero kay basin maapil sa bunal ang mga nanarbaho og tarong panahon sa kagabhion.
Sa kasamtangan, wa pa’y nakaila kinsa ang mga sakop sa Bunal Squad human mikatag sa social media ang video sa ilang mga hulagway.