NAGBUY-OD ug naligo sa ilang kaugalingong dugo ang duha ka mga lalaki human nabangga ang gisakyang motorsiklo sa usa ka pribadong sakyanan diha sa Zone 4, Barangay Bugo ning siyudad sa Cagayan de Oro.
Giila ang mga biktima nga mao sila si Saturnino Taburnal, 60 ug Benjamin Lumani, 62, pulos barangay tanod sa Barangay Casinglot lungsod sa Tagoloan, Misamis Oriental.
Sa inisyal nga imbestigasyon sa Police Station 6 (PS6) sa Puerto nasuta nga kining mga biktima gikan nagpahina.
Nakainom ug giingong lango sa ilimnong makahubog nga miuli.
Apan pagdangat sa checkpoint posibleng nabalaka ang duha nga masita kay wala sab nag sul-ob og helmet mi-uturn ang driver maoy hinungdan nabangga sa naghaguros nga pick-up.
Bali ang mga tiil sa duha ug grabeng bun-og ang naangkon sa kalawasan.
Pulos gidala sa Sabal Community Hospital apan dead on arrival nga gideklarar sa doktor.
Pagsulat ning balita gidala na sa Everlasting Funeral Homes kinsa pamilya sa mga biktima namahayag nga posibleng dili na magpasaka og kaso sa driver apan sa mga galastuhon.