GIINGONG dili magmakuli ang road clearing composite team sa siyudad sa Cagayan de Oro nga sudlon ang area sa Misamis Oriental Capitol Compound aron i-demolish ang mga nakababag sa dalan nga gipanag-iyahan sa gobyerno.
Kini ang giluwatan nga pahayag ni Antonio Resma Jr., ang tigpamaba sa composite team.
Giingon niini nga buot lamang nilang ipatuman ang kamandoan ni Presidente Rodrigo Duterte pinaagi sa Memorandum 121-2019 nga kuhaon og balik ang dalan sa gobyerno ug gubaon kung unsa man ang mga nakababag.
Matud ni Resma nga unta moaksyon niini ang probinsya kay lakip man kini sa gimandoan ug sila na mismo ang mag-clearing niini kay kon dili mapugos sila og pahigayon sa clearing operation labina nga iya sa siyudad ang pipila ka bahin sa Kapitolyo probinsyal.
Namatikdan nga daghan mamaligyaay sa kilid nga nagrenta sa Kapitolyo.
Apan si Misamis Oriental Governor Bambi Emano nagpagawas og opisyal nga pahayag nga iyang panalipdan ang mga propriedad ug kabtangan sa Kapitolyo.
Matud niini nga dili dautan ang pagpatuman sa kamanduan sa Pangulo sa Pilipinas nga paghinlo sa iligal nga estruktura nga nakababag sa trapiko.
Gani iyang gisuportahan ang panawagan sa Presidente nga gipatuman pinaagi sa DILG. Apan wala gikalipay niini ang bahad pamahayag nga sudlon ang Kapitolyo probinsyal.
"Nalimot man tingale sila nga ang Kapitolyo dili iya sa siyudad ug walay labut sa bisan unsang opisyal nga kalihukan ang mga kadagkuan niini ug dili mahimo nga mag apil-apil sila sa pagdumala sa kagamhanan sa lalawigan,” matud ni Emano.
Gidugang sab niini nga sulbaron una sa siyudad ang problema sa kahuot sa trapiko usa matud pa manghilabot sa tugkaran sa kapitolyo.
“Sulbara ang traffic pinaagi sa pag hapsay sa mga nag-unang dalan sa siyudad, ipatuman ang no parkingsa mga hagip-ut nga dalan, klaruhon ang oras sa Track ban, ipa-angat ang kahibalo ug propesyunalismo sa RTA, tutukan ug ayo ang problema," dugang niini.
Hangtod karon panahona nagpadayon ang clearing operation bisan pa nga deadline niini niadto nag Septiyembre 30.
Ang 60 diyas nga kamandoan nagsugod niadtong Hulyo 29 human ang Department of the Interior and Local Government (DILG) nagmando sa mga local chief executives nga limpyuhon ug puhagon ang mga nakababag sa kadalanan ug kung dili kini matuman sa mga local nga opisyal mahimo silang mag atubang og kaso.