HUMAN sa pag-surrender sa tulo ka mga Children in Conflict with the Law, ang mga awtoridad nagpaabot nga aduna pay laing mga menor-de-edad ang mobalik sa Operation Second Chance.
Si Konsehal Dave Tumulak sa Cebu City south district nagkanayon nga aduna silay nadawat nga report nga mo-surrender ang pipila sa mga minor nga padayon pang gipangita.
Sa kasamtangan, walopa ang wala masikop sa kapulisan ug jail officer nga gi dudahan nga padayon pang nagtagotago.
Si Tumulak niawhag ngadto sa ginikanan sa maong 8 ka minors sa pagkumbinse sa ilang mga anak kon ugaling niuli sila sa ilang mga balay o nasayod sila sa nahimutangan para dili na sila mag-atbang og dugang kaso.
Atol sa kusog nga dugdog ug kilat niadtong Biyernes, Oktubre 4, ang 30 ka mga nakahigayon sa pag-eskapo.
Maayo na lang nga ang 10 nabantayan diha pa sa main gate sa pasilidad samtang ang 20 hingpit nga makagawas sa gate.
Sa gipahigayon nga hot pursuit operation, nasikop og balik ang walo niadtong gabhiuna ug pagka-ugma, ang tulo ni-surrender ug gihatod sa mga pulis didto sa barangay Kalunasan. (PAC)