NATIBWAY ang kinabuhi sa usa ka 20-anyos nga ulitawo human siya gipusil didto sa Cotabato.

Biktima giila nga si Bajunaid Acmad, estudyante, ug molupyo sa Purok Sampaloc, Sitio Manday, Mother Barangay Bagua.

Sa taho gikan sa Cotabato City Police Office, nasayran nga banda alas 5:00 sa hapon, Marso 8, samtang naglingkod ang biktima duol lamang sa iyang gipuy-an kalit kini nga giduol sa mga armadong lalaki, dayon gipusil gamit ang .45 nga pistola.

Namatay diha-diha dayon si Acmad human malubngi og bala ang iyang dughan ug ulo.

Mga mamumuno abtik sab nga mikabayo sa motorsiklo dayon sibat sa wala matinong lugar.

Matud ni Baican, nga sa wala pa mahitabo ang pagpatay sa iyang igsuon, nakasulti kini nga may grupo siyang naka-away, gihulga siyang patyon kun dili molayas sa siyudad.

Nagtuo si Cotabato City Police Director SSupt Willie Dangane nga posibleng personal nga atraso, away sa druga ang rason, gumikan nalambigit si Acmad sa pagpayuhot sa ginadiling druga.

Sa pagka karon, ang kapulisan nagpadayon sa ilang imbestigasyon. (Edgardo Fuerzas)