WA PA matino kon gibilin o nahulog ang itom nga sling bag nga gisudlan sa gibana-bana dul-an sa P3 milyones nga gituohang shabu nga motimbang sa 400 gramos.
Matod pa ni P/Capt. Armando Labora, hepe sa Parian Police Station sa Cebu City Police Office nga ang maong bag posibleng gibilin o nabiyaan.
Nasuta nga shabu diay ang sulod nga gipangputos tag- 25 gramos ug gibana-bana moabot sa P2.7 milyones ang kantidad gi turn-over ngadto sa nag-roving nga pulis.
“Aw murag di gyud to maka tulog nga mag hapa tungod kay milyones iyang lugi kadako nga kwarta nga nawala sa iyaha (drug pusher),” matod pa ni Labora sa dihang nahinabi sa Superbalita Cebu.
Nasayran nga usa ka government employee maoy nakadiskubre sa maong bag tungod sa tunghaan sa Barangay Zapatera samtang nagbaktas ang maong kawani.
Na-agni sa pagpunit ang maong tawo sa pagtuo nga gilabay ang maong butang.
Naatol nga milabay ang patrol car sa tungod iyang giturn over ang maong bag ug didto nasuta ang binulto nga shabu nga gisulod sa pouch sa tea.