WALAY nakitang foul play ang mga sakop sa Scene on the Crime Operation sa patayng lawas sa 10 anyos nga batang lalake nga napalgang wala nay kinabuhi sulod sa sakyanan ni Fire Officer 1 Orland Paul Romero.
Ang maong sakyanan giparada sa gawas sa buhatan sa Bureau of Fire Protection niadtong Sabado, Oktubre 5.
Ang patay nailhan nga si John Michael Puentenegra, taga- Sitio Manga, Barangay Cambuhawe sakop sa maong lungsod.
Matod ni Police Major Christian Torres, hepe sa Balamban police station nga human migawas ang resulta sa SOCO, ilang gipahibawo ang inahan kon buot ba niini ipaubos sa autopsy ang lawas apan nagdumili ang mama.
Niadtong Domingo, Oktubre 6 gilubong sa ginikanan ang bata sa publikong sam-ang sa lungsod sa Balamban.
Apan wala pa gihapon mahunong ang imbestigasyon bisan pa man nga sa inisyal nga resulta walay tulobagon si F01 Romero.
“Gi-investigate namo ang bombero together sa among Provincial Investigation and Detective Management Branch wala man tay makita nga iyang negligence or iyang intention nga patyon niya tong bataa pero so far ongoing gihapon ang paginvestigate,” matod pa P/Major Christian Torres.
Lakip sa ilang sutaon sa imbestigasyon nganong nakasulod ang bata sa sakyanan ni Romero nga unta automatic lock man ang mga pultahan niini.
Naglisud sila sa pag establisar giunsa sa pag sulod sa bata tungod kay walay CCTV camera sa dapit diin gi parking sa fire officer ang iyang sakyanan.
Nagduda si Major Torres nga sa pag-abot ni Romero misulod usab kini dayon sa sakyanan ug pipila ka sigundo na lock na kini ug dili na maka-abli pa ang biktima nga naa sa sulod.
Gihulagway ni Major Torres ang maong bata giingong hilabtanon sa ilang lugar ug sa edad nga 10 anyos naa pa kini nag tungha sa Grade 1.
Duda sa ilang imbestigasyon nga manguhag butang ang biktima sa sulod sa sakyanan ni FO1 Romero tungod kay nanga bungkag na ang mga fuse box ug uban pang butang sa sulod.
Si Police Brigadier General Debold Sinas hepe sa Police Regional Office 7 natagbaw ra sa imbestigasyon sa Balamban police station.
“Kung gusto sa inahan nga further investigation then will have the body exhumed, as of now will checking kung unsay negligence sa fireman,” matod pa ni Sinas.
Apan si Police Colonel Roderick Mariano ang hepe sa kapulisan sa probinsya sa Sugbo nagkanayon nga mopalawom pa sila sa imbestigasyon ilabi na nga nakadawat silag impormasyon labot sa maong insidente nga angayang subayon pag ayo sa mga imbestigador.
Angayan pa nga ipa-ubos sa imbestigasyon ang fireman kon nagtug-an kini sa tinuod tungod kay makapaduda ang pangangkon niini nga posibling nakasulod ang bata sa dihang wala pa kini ma lock.