LAING duha ka batan-on nga kuyog nga nipuga gikan sa Operation Second Chance sa Barangay Kalunasan, dakbayan sa Sugbo niadtong Sabado, Oktubre 5, 2019, pormal nga mitahan sa mga otoridad karung Lunes sa hapon, Oktubre 7.
Si Marlon (dili iyang tinuod nga pangan), 17 anyos, ug si Jerome, 16 anyos, niangkon sa Superbalita Cebu nga nipuga sila kuyog sa siyam pa ka mga Children in Conflict with the Law (CICL) tungod sa giingon pagmaltrato niini sa ilang mga "house parents" ug mga sakop sa kapulisan nga na- assign sa maong pasilidad.
Sigon ni Marlon nga nahimong tensionado ang relasyon nila ug sa ilang mga bag-ong house parents sa dihang gipahamtang niini ang silot nga kung naay usa nga makasala nila, ma-among ang uban.
"Gitrato naman mi nila nga piniriso, mao tong nipuga nalang mi," sigon ni Marlon.
Matod ni Marlon nga gawas sa mga house parents nila, bisag ang mga police detail nga naka-assign didto sa ilaha kay muapil sad ug silot nila.
Pangangkon ni Marlon nga mugamit sila ug arnis ug linokot nga habol nga gibasa para ibunal nila isip pagdisiplina nila.
Sa iyang bahin, niingon si Jerome nga wala unta siyay plano nga mukuyog sa mga nipuga nga mga CICL pero nikuyog nalang sa kahadlok nga basin maapil ug silotan sa ilang mga house parents.
"Kung sayop sa usa, sayop sa tanan para nila," sigon ni Jerome.
Duha ka adlaw sukad nipuga sila, nakadesisyon sila nga musurrender nalang sa kapulisan sa kahadlok nga basin ipapriso ang ilang mga ginikanan.
Niangkon si Marlon nga sa dihang nakapuga siya, nidiretso siya sa balay sa iyang inahan.
Ang iyang inahan mismo maoy nikonbinsir niya nga musurrender nalang tungod sa kahadlok.
Karun nga anaa na sila sa kustodiya sa mga otoridad, nihanyo ang duha ka batan-on nga dili na mausab ang pag-abuso kanila ug sa ilang mga kaubanan.
Sa iyang bahin, plano ni Cebu City Police Office (CCPO) director P/ Col. Gemma Vinluan nga padungagan ug duha pa ka pulis nga i-assign sa Operation Second Chance isip additional security measure sa maong pasilidad.
Human nakadungog siya sa mga yangongo sa mga batan-on nga nag-istar sa maong pasilidad, plano sad ni Vinluan nga magpadala ug mga chessboards sa Operation Second Chance para kalingawan sa mga bata.
Iya sang gihanyo ang usa ka dakong fastfood chain dinhi sa Sugbo para mudonate ug pagkaon para sa mga bata human kini nisulti nga wala na sila nakakaon niini.
Si Marlon ug Jerome kay duha lang sa lima ka batan-on nga kuyog sa 11 kabuok CICL nga nipoga gikan sa Operation Second Chance niadtong Sabado.(Superbalita Cebu)