NGANO man ning media conference sa Viva nga ipaagi na man lang sa video ang interbyu sa ilang mga artista.
Ang pinakauwahi kang Sarah Geronimo nga nag-promote sa iyang pelikula. Ambot unsa toy title nakalimot ko. “Unforgettable” ba to?
Ayaw sad intawon ninyo sayonsayona ang mga entertainment writers uy.
Maayo ra ba og unsay estoryahan ang pelikula ra man gihapon nga mabasa ra sa ilang press release. Pagka!
Ambisyon
Usa sa mga pelikula nga gusto unta nakong makit-an ninyo ang pelikulang “Mina Anod.”
Kahibawo ko nga daghan ang wa kakita niadtong Agusto sa “Mina Anod” sanglit di man siya mainstream.
Pero dunay talagsaong pagtulun-an ang maong pelikula diin gipakita dinhi nga ang mismong mga awtoridad ra usab ang tig-recycle sa mga illegal drugs o gitawag nilang “ninja cops.” Puyra sa maayo kay di man sad tanan.
Kini tungod sa mga kapritso ug ambisyon nga magpuyo nga buhong sa materyal nga mga butang.
Werdo?
Giwerdohan ko sa interbyu namo ni Jericho Rosales kay ingon siya successful kuno siya sa TV, career, music ug ubang butang pero wa gyud siya moingon nga successful siya sa iyang married life.
Gift kuno sa iyang misis nga solo nga mo-travel abroad. Pero atol gyud sa iyang 40th birthday?
Ambot lang basin style sad ni nila. Pero kahinumdom ko nilang Martin Nievera ug Pops Fernandez nga wa dayon moangkon sa ilang break-up tungod sa ilang mga endorsement isip magtiayon.
Mga pahalipay
Mga pahalipay sa Sun.Star ug Superbalita Cebu nga nanghakot og mga pasidungog sa annual CAMMA Awards sa miaging adlaw.
Di pa lang dugay ang Sun.Star ug Superbalita Cebu nanghakot sab sa Globe Media Excellence Awards. Di na hinuon ni ikahibong kay bisan sa una pa naila na ang Sun.Star sa taas niyang kalidad.
Mao nga niadtong 1987 nahimong “mantra” sa Sun.Star jingle ang “It’s No.1, it’s the biggest!”
Salamat
Palihug ipada na ang inyong mga kupon kay 12 na lang ka adlaw deadline na sa atong pre-Anniversary Promo sa Superbalita.
Salamat sa atong mga higalang sponsors sama sa Cebu’s Original Lechon Belly, Chilen Chicharon ug Mountain Paradise Resort.