LIM-AW. Pipila na katuig ang nanglabay, ang kilid sa dalan padulong ug pagawas sa City Hall sa dakbayan sa Lapu-Lapu mao lang gihapon. Samtang espaltado ang dalan, apan ang kilid sa dalan lapok ug daghan ang lim-aw tungod kay walay kanal.
Sa kaniadto pa ni nga administrasyon nga wa ni mahatagi og pagtagad. Gikan sa Lunes hangtod sa Biyernes kini maoy agianan sa mga nagtrabaho ug sa mga tawo nga adunay tuyo sa city hall ug sa korte ug korte.
Samtang gipanindot sa mga nag-una nga administrasyon sa dakbayan sa Lapu-Lapu ang mga koral, lakip na ang mga pribado nga koral, pinaagi sa pagpintal niini og nindot nga mga kolor, apan kining dalan padulong ug pagawas sa city hall nahikalimtan nga mao untay ganghaan sa dakbayan.
Akong gi-texan kagahapon sa buntag si Oscar Pineda, ang PIO sa dakbayan sa Lapu-Lapu, sa akong nakita sa kahugaw sa dalan sa akong pag-adto sa regional trial court. Taudtaud, mitubag si Oscar pinaagi sa pagpasa sa tubag-text ni Mayor Ahong Chan nga nag-ingon: “nag-allocate nata budget ana next year for drainage, sa pagka karon i-drain lang usa sa waste management.”
Sa ato pa mantinil usa og limpyo sa lim-aw ug hugaw sa kilid sa dalan samtang ang City Council sa Lapu-Lapu nag-umol pa sa budget aron mabutangan og kanal o drainage kining dalan padung ug pagawas sa city hall. Ning panahon karon nga ting-uwan mora og daghan trabaho ang taga waste management, nga wa gani diha gahapon.
Nagpasabot lang ni nga sa pagbuhat sa dalan padulong sa city hall wala buhati og kanal kon drainage. Susmaryosep! Di man ko enhenyero apan nagpasabut lang ni nga wa gilakip sa nagdesinyo ug nagtrabaho sa city hall ang kanal sa masigkakilid sa dalan, nga karon daghan na kaayo ang opisina ug naninda og pagkaon.
Nahimuot ko nga nagtan-aw sa usa ka abogado (di lang na ko hinganlan) nga sa paggawas sa iyang sakyanan naglukso-lukso aron makalikay sa lim-aw ug lapok sa kilid sa dalan nga maoy gihimo nga parkingan sa mga sakyanan-pribado sa mga tawo nga moadto sa korte.
Ang tubag ni Mayor Ahong Chan sa text nga akong gipadangat ni Oscar Pineda nagpasabut nga nakahibawo na siya sa kahugaw ug kabasa sa tubig-uwan ning maong dalan. Nakanotisya man gani ta nga dili pirmi nga moanha sa city hall ug korte, ang mayor pa ba kaha nga matag adlaw nag-opisina.
Ang uban nga mga opsiyales sa dakbayan sa Lapu-Lapu, labina sa mga konsehal, nagpakabuta-bungol ra ba sila sa ilang nakita ning maong dalan?
Sa kadugay na nga panahon wa gyud maggimok ning mga konsehal nga mag-alokar og pundo aron mabuhat og kanal kini nga dalan.
Ang giseguro sa mga konsehal, nga kadaghanan kanila mga ka-alyado ni kanhi Mayor Paz Radaza, nga karon kongresista na sa nag-inusara nga distrito sa kongreso, mao ang pagpasar og resolusyon nga naghatag og libre nga opisina sa kongresista diha sa city hall. Apan gideklarar sa Department of Interior and Local Government (DILG) nga ilegal ang maong resolusyon.
Angayan nga mauwaw ang mga opisyales sa dakbayan ning estado sa nahisgutang dalan tungod kay ilang gipresentar sa kalibutan ang dakbayan nga usa ka turismo, apan ang iyang dalan padung sa city hall hugaw.