SA MAKAUSA pa, midominar na usab ang SunStar Publishing Inc. sa laing media awards nga gipahigayon dinhi sa Sugbo.
Niadtong Dominggo gilabni sa SunStar Cebu ug Superbalita Cebu ang siyam sa onse ka mga awards sa print category sa ika-19 nga Cebu Archdiocesan Mass Media Awards (Camma) didto sa SM Seaside City Cebu.
Sa kategoriyang Cebuano (print), ang Superbalita Cebu nakadawat og citations alang sa Editorial Writing, Special Reporting or Investigative Writing, Feature Writing ug News Writing, kortesiya ni Sheila C. Gravinez. Wala modeklarar ang Camma judges og “Best in” sa Superbalita Cebu tungod kay bugtong kini lang ang ni-submit og entries.
Samtang sa English category, ang SunStar Cebu mao usab ang miharos sa Best in Editorial Writing, Best in Special Reporting and Investigative Writing ni Cherry Ann Lim, Best in Editorial Cartooning ni Joshua Cabrera, Best in Column Writing ni Melanie T. Lim ug Best in Photo Journalism ni Alex Badayos.
Kini migintang lang og duha ka semana kapin gikan sa laing pagpanaog og awards sa SunStar sa laing kalihukan nga gipahigayon sa lahi usab nga organization.
Niadtong Septiyembre 19, ang Sun.Star Publishing Inc. milangkat og lima ka mga pasidungog atol sa Globe Media Excellence Awards (GMEA) nga gipahigayon sa Radisson Blu hotel.
Tungod niini, ang kinatibuk-ang puwersa sa SunStar Family malipayon ug mapasigarbuhon sa mga sunodsunod nga naangkong award ning tuig 2019.
Taliwala ning tanan, kami mapasalamaton usab ngadto sa mga batid namong tigsunod ug tigbasa nga maoy nakapadasig diri kanamo sa pagsubsob pa sa tanan namong kahibawo aron paghatag kaninyo sa tukmang katagbawan.
La-omi nga amo kining ipadayon ug dugangan pa ang among kaikag ug kahago alang sa tinud-anay nga pagserbisyo diha kaninyo.
Daghang salamat kaninyong tanan.