NAKAHAKOT ang lokal nga mga lumolupyo ning bag-o pa lang og 2.8 ka tonelada nga kasagaran mga plastik nga basura sa kabaybayonan sa South Poblacion ug Panadtaran ug subay sa sapang Luknay sa San Fernando.
Itandi sa miaging tuig, mas menos og mga usa ka tonelada nga sinalibay, o’ mga 335 ka mga sako, sa ika-11 nga tinuig nga pagpahigayon sa kampanyang Save Our Seas (SOS) nga gipasiugda sa Taiheiyo Cement Philippines, Inc. (TCPI).
“Maayo kini nga tima-ilhan nga ang atong mga silingan nakamatngon na sa paghipos ug pagtarong og labay sa basura. Pipila na lang ang mga nagpataka’g balay,” mikutlo si Eng’r. Romeo M. Gebilaguin.
Mipadayag si Gebilaguin, tagduma sa TCPI alang sa kalikopan ug kahilwasan, nga gikahimuot niya nga mibunga na ang tinuig nga kalihukan ug pakig-alayon sa mga tagibarangay sa koponan sa komoanya nga nakig-ambit nila.
“Dayag nga pipila sa mga basura nga atong nahipos mga nilabay sa ubang dili taga-diri o’ nadala sa mga balud gikan sa ubang baybayon,” siya midugang.
Gihangop ni Gebilaguin ang mga misalmot nga naglakip sa mga timugyanan sa Mines and Geosciences Bureau (MGB-7), Environment Management Bureau (EMB-7), ug Community Environment and Natural Resources Office (CENRO) nga nag-base sa Argao ubos sa Department of Environment and Natural Resources (DENR).
Lakip sa mga miboluntaryo mga kawani sa kagamhanang lokal sa San Fernando, Bureau of Fire Protection (BFP), TCPI ug sa tigpanangkap niini og mga minerales alang sa paghimo’g semento, ang Solid Earth Development Corp. (SEDC).
Gihatagan sa TCPI ang mga misalmot og kamisetang handomanan ug kasangkapan sa pagpanglimpyo sa ilang pag-abot sa multi-purpose recreation center sa kompanya sa wala pa ang alas-7 sa buntag.
‘Dakong epekto’
Atol sa hamubong programa, gihimug-atan sa tagduma sa planta sa TCPI nga si Chiyuki Sugawara, kasamtangan sa’ng senior vice president for operations, nga ang pangunang hinungdan sa marine pollution ang pagpataka’g labay og plastik.
Gihisgutan niya ang taho sa miagi lang Marso kabahin sa 4.6-metros nga bayong-bayong pa’ng Cuvier’s beaked whale nga midagsa sa kaugalingon sa Mabini sa Compostela Valley kansang tiyan aduna’y 16 ka mga sako sa bugas ug nagkadaiyang plastik nga mitimbang og 40-kilos.
“Kung magpadayon kining kahimtanga, ang maanindot natong kadagatan padayong mahugawan, ug sa ngadto-ngadto may dakong epekto sa atong kinabuhi,” siya miingon. (PR)