“CARBON queen” maoy tawag kang Consuelo “Lola Soling” Bacaltos, 100, sa iyang pamilya kaniya tungod sa iyang kakugihan nga mangumpra sa merkado nga mag-commute kun mosakay og pasaheroang sakyanan bisan sa iyang pangidaron.
Kon motungtong na ang alas 4 sa kaadlawn, mogikan na si Lola Soling nga di manumbaling sa ka layo sa merkado basta makakompra kini og mga presko nga utanon ug karne para sa pamilya.
Ang iyang pagka Carbon queen tungod sa iyang kada adlaw nga pagpangompra kaniadto sa merkado publiko sa Carbon dihang nagpuyo pa siya sa Dakbayan sa Sugbo.
Ang makabilib niya kay lantip pa siya og pangisip ug maayo pa mag-ininglis sa pangidaron nga 100. Niadtong Oktobre 5 gisaulog sa iyang pamilya ang kasumaran sa iyang adlaw nga natawhan.
Bisan sa iyang pangidaron, kusog pa siyang molakaw aron mangumpra sa merkado, mosimba, mobisita sa uban nilang paryente nga mag-commute ra ug siya sab ang mangunay og buhat sa mga buluhaton sa balay.
Diet gud
Nagkatawa si Lola Soling dihang gipangutana kon unsa ang iyang diet nga nakaabot siya sa iyang pangidaron karon.
Sigon pa niya nga wala siyay gisunod nga diet kay mokaon gihapon og baboy, paresan og utan.
Dugang sab sa iyang pag-umangkon nga si Cora Ann nga naka-amot og dako sa maayong panglawas ni lola Soling ang iyang pagsige og pangumpra tungod kay kini ehersisyo niya, labi na kon mag-commute ra bitbit sa iyang bayong nga bug-at.
Niadtong 70 anyos pa si Lola Soling, naglakaw siya padulong sa ilang balay sa una sa Nichol’s Heights, sa Brgy, Guadalupe, Dakbayan sa Sugbo, gikan siya nangumpra dihang natapsingan sa sakyanan nga gimaneho sa anak sa iyang amiga.
Nahayang siya apan dali siyang nakabarog ug nilakaw nga murag wala ray nahitabo.
Niinsister ang iyang pamilya nga dad-on siya sa hospital, apan niuli dayon siya pagka-ugma sa balay gikan sa ospital kay sigon pa niya nga dili siya masakiton nga magpaospital.
Negusyante sab
Nailhan si Lola Soling sa iyang negosyo nga lumpia, empanada ug bihon.
Ang suki kaayo niya nga kustomer mao si Jose “Dodong” Gullas, usa sa mga tag-iya sa University of the Visayas (UV).
Sigon ni Cora Ann, tungod kay wala naminyo si Lola Soling, ang iyang negusyo tabang niya sa pagpaeskwela sa iyang mga pag-umangkon, pipila kanila nakaeskwela sa Sacred Heart School- Ateneo De Cebu.
Dili lang Carbon queen ug negosyante si Lola Soling apan usa sab kini ka magtutudlo niadto.
Magtutudlo kini si Lola Soling sa Cebu Chinese High School niadtong 1940 ug nibalhin sa pagtudlo sa Zapatera Elementary School.
Daghan sa iyang mga tinun-an mga sakop sa inilang banay, sama sa mga Gaisano ug Gothong.
Ni-retire si Lola Soling niadtong 1982 ug nipuyo na kauban sa iyang igsuon nga si Maria “Lola Mary” Bacaltos-Canonigo, nga usa sab ka magtutudlo.
Sa ilang pito ka managsuon, sila nalang duha ang nahibiling buhi.
Ika-lima sa pito ka managsuon si Lola Soling. Si Lola Mary, sama kang Lola Soling, milapas na og 100. Sa miaging buwan gisaulog niya ang ika-105 nga birthday.
Gawas sa pag-atiman sa mga buhatunon sa balay ug pagpangumpra, nabatasan sab ni Lola Soling nga mag-rosaryo matag buntag, hapon ug gabii kauban iyang igsuon nga si Lola Mary.
Karon, ang managsuon sa Simala, Sibonga, Cebu na nagpuyo kauban ang ilang mga caretaker.
Wala na’y gipangayong lain si Lola Soling kon dili ang grasya sa Ginuo tungod dako na kini og nahatag niya labi na sa paglungtad og dugay niining kalibutana.
Gusto lang niya nga permaninting hinumdoman sa iyang mga pag-umangkon ug mga apo nga magtarong og eskwela.
“Life is towards growth and when you get old and you have not finished your course, you’ll be living a life of regret,” dugang ni Lola Soling.