GIKOMPIRMAR sa Bureau of Fisheries and Aquatic Resources (BFAR) 7 nga fish kill kadtong nahitabo mga pagkalutaw sa mga isda sa Pond A sa South Road Properties sa miaging semana.
Matod ni BFAR 7 regional director Alfeo Piloton nga dihang nadawat nila ang taho kabahin sa maong fish kill nipadala siya sa iyang team sa dapit aron mokuha og water samples.
Dihang nigawas ang resulta sa ilang water quality analysis nasuta nga taas ang temperatura sa tubig sa Pond A.
Sa resulta sa ilang pakisusi niabot sa 36 degrees celsius ang temperatura sa tubig diin nilapas kini sa tolerable limit sa isda nga anaa lang dapat sa 30 degrees celcius.
“Ang cause sa death gyud is high water temperature niya zero ang iyahang dissolved oxygen mao nay makapatay sa isda, ang rason ani mao nato nga taas ang temperature,” matod pa ni Piloton.
Dugang niini nga ang maong dapit dili na angay sa mga aqua-cultured tungod kay wala kini sa tukma nga water management.
Nasuta usab nga below normal na ang bacteria level sa Pond A base na usab sa ilang pakisusi hinungdan nga di mamahimong kagaw ang nipatay sa mga isda.
Subay sa ilang water analysis nasuta nga taas ang ammonia sa dapit ug gihulagway nga polluted ang tubig tungod kay anaa na kini tungod kay natung-an sa mga nagkadaiyang industriya.
Nipahimangno si Piliton ngadto sa mga residente duol sa maong dapit nga dili manguha sa a-maong mga isda ug nakig-alayon na sab sila sa local government unit (LGU) aron magiyahan ang mga lumolopyo.
Samtang ang executive director sa Bantay Dagat Cebu City Ariel Yburan nibutyag nga moabot na sa 600 ngadto sa 700 kilos sa mga isda sa Pond A namatay tungod sa fish kill.
Nasayran nga nagsugod ang maong hitabo niadtong Oktubre 3 ug pagkasunod adlaw gisusi ang maong lugar ug nakita nila ang daghang mga patay nga mga isda sama sa bangus, tilapia, pansat ug halwan.
“Mga adjacent nga mga balay nanulod na to the extent giguba nila ang gate sa Pond A niya government property baya na niya akong gi explain nila nga ayaw mo pag trespass kay filan mog kaso niya nangguba pa gyud mo, ikaduha kanang isda inyong gikuha makadaot na ninyo labi na katong bloated na bitaw niya baho na gud”, pahibawo ni Yburan. (HBL)