GIKLARO sa Department of Health (DOH) 7 ang nanggawas nga taho sa giingong kaso sa Meningococcemia nga mitumaw sa Sugbo, human nga adunay Business Process Outsourcing (BPO) company ang gi-quarantine kay matod pa ang usa sa kawani niini ang namatay tungod sa maong sakit.
Matod ni DOH 7 regional director Dr. Jaime Bernadas nga wala’y taho sila nga nadawat nga nagpamatuod niini.
Dugang pa nga dili usab tinuod nga gipa-ubos sa quarantine ang usa ka BPO company.
Gitataw sab sa pangulo sa Regional Epidemiology and Surveillance Unit (RESU) 7 Dr. Shelbay Blanco nga aduna silay nadawat nga report nga adunay namatay nga 22-anyos nga babaye sa usa ka pribadong tambalanan ug giingong meningococcemia ang hinungdan.
Apan base sa ilang imbestigasyon migawas nga negatibo, kini nagpasabot namatay ang babaye dili tungod sa meningococcemia.
Usa sa kawani sa maong BPO company nipahibawo dili meningococcemia ang gikamatyan sa maong babaye sigun sa iyang pamilya.
“Wala oy, nagtake ra og precautionary measures pero wala gi-quarantine. “There is already a confirmation to the issue and there is no truth that she died of Meningococcemia. Employees have been informed as well,” matod sa usa sa kawani sa maong BPO Company nagdumili sa pagpaila.
Samtang ang RESU mibutyag nga base na usab sa blood samples niguwa nga negatibo ang maong babaye sa maong makatakod nga sakit.
Paghulagway ni Blanco nga ang meningococcemia usa kini ka sakit nga ang hinungdan mao ang kagaw nga neisseria meningitidis nga mokatag sa lawas ilabi na sa dugo ug moresulta sa multiple organ failure.
Dugang ni Blanco nga ang sakit niadtong 22-anyos nga babaye sepsis gihapon apan ang hinungdan sa sepsis niini mao ang streptococcus agalactiae diin lahi kini nga bacteria ug dili kini makatagod susama sa meningococcemia ug neisseria meningitidis.
Nasayran nga ang meningococcemia mamahimong makuha gikan sa pag-ubo ug pag-hatsing sa anaa niini.
Tambag ni Blanco sa publiko nga magpabilin nga atimanon ang panglawas aron dili dali masakit. Giklaro usab sa mga opisyal sa DOH 7 nga wala’y kaso sa meningococcemia sa Central Visayas. (HBL)