GOOD news alang sa mga pasyente nga ma-admit sa Cebu City Medical Center (CCMC).
Gipahibawo ni Yvonne Cania Feliciano, hospital administrator nga ubos sa administrasyon ni Mayor Edgardo Labella, gi-doble na ang budget sa pagkaon alang sa mga pasyente.
Gitug-an ni Feliciano nga sukad pa kaniadto, P25 ra ang budget sa pagkaon apan gihimo nang P50 sa mga pasyente kon 100 porisyento nga usbaw nga libreng gihatag sa siyudad.
“Pila na ka tuig ang nakalabay, ang budget sa meal wala gyud na mahatagi og pagtagad, so karon pag tan-aw nako, luoy kaayo ang pasyente kay P25 ray budget intawon kada kaon,” saysay ni Feliciano.
Gitug-an sa maong opisyal nga ang P1.3 milyones nga pundo gikuha sa Supplemental Budget No. 2 nga giaprobahan sa miaging buwan.
Iyang gibutyag nga ipatuman karong buwana ang tag P50 nga budget sa matag kaon sa mga pasyente kon P150 ang matag adlaw.
Ang pag-usbaw sa meal budget sa mga pasyente gitugotan ilawom sa direktiba sa Department of Health diin ang ospital gitugotan nga makadugang ngadto na sa 100 porsiyento.
Gipadayag ni Feliciano nga ila nang gi-andam ang mga dokumento sama sa pagpapirma ni Labella ug sa City Treasurer’s Office sanglit anaa na ang pundo.
Ang CCMC sa labing talaan adunay 138 ka pasyente nga kasamtangang gi-atiman sa mga ward.
Si Feliciano nagkanayon nga bisan kon wala pa makabalhin sa bag-ong building ang mga pasyente sa CCMC, makaserbisyo na sila og kapin 200 ka mga tawo sa Out Patient Department.
Atol sa founding anniversary sa maong tambalanan niadtong Biyernes, sila si Feliciano ug mga opisyal sa dakbayan naghatag og libreng pagkaon sa kapin 100 ka mga pasyente. (PAC)