GITUOK ug gihapak og gahi nga butang ang nawong ni Jouie Lee Villagonzalo sa wa pa pusila sa ulo hinungdan sa kamatayon niini.
Ang pagbunal miresulta sa pagkabuak sa ulo.
Ang lawas ni Jouie Lee gilabay sa mingaw nga dapit sa sitio Kabaasan, Barangay Tagbao, bukirang dapit sa Siyudad sa Sugbo niadtong milabayng Miyerkules sa buntag, Oktobre 2.
Ang PNP Crime laboratory nga maoy ni-autopsy sa lawas ni Jouie Lee nakadiskobre sa pagkaboak sa ulo niini.
Adunay agi sa tinuokan ang liog, matod ni Police Corporal Michael Angelo Singson, imbestigador sa Talamban Police Station nga maoy nag-imbestigar sa kaso.
Ang impormasyon gidasunan usab ni Jocelyn Villagonzalo, inahan ni Jouie Lee, nga nibutyag usab nga gituok ang liog sa iyang anak gamit ang pisi.
Tungod niini, nagtuo si Singson nga adunay dakong kasuko kang Jouie Lee ang mga killer.
Ang unang pagduda sa kapulisan nga tulis ang motibo tungod kay nawagtang ang mahalon nga cellular phone niini.
Karon, aduna na silay gisubay nga anggulo nga di una nila ikabutyag kon unsa.
“Kon ang tumong patyon gyud siya, patyon na lang siya diretso. Nganong ingon ato man. Duda namo naay kasuko ang nagdapat niya usa siya gipatay. Kon tulis sad, diha-diha dayon pusilon na siya kon dili ihatag ang butang. Dili na siya kargahon og sakyanan,” pasabot ni Singson.
Aduna nay kopya sa CCTV video ang mga sakop sa Talamban Police Station gikan sa usa imnanan sa dalan Juana Osmeña, Barangay Capitol Site, Siyudad sa Sugbo.
Nag-inom
Makita sa video nga nag-inom si Jouie Lee uban sa duha ka lalake ug usa ka babaye nga nailhan na usab sa Talamban police station.
Gisukit-sukit na usab sila diin ang pamahayag sa usa sa mga nakainom nagkanayon nga kalit lang og kawagtang si Jouie Lee ug wa na sila masayod diin paingon.
Apan sa pamahayag sa live in partner ni Jouie nga si Iznairah Chiong nga nahinabi sa Superbalita Cebu, iyang na estorya ang usa sa gikainom sa iyang hinigugma.
Human sila nag-inom, nagbaktas sila paingon sa General Maxilom avenue aron mosakay og jeep nga adunay rota nga 03B.
Gihulagway sa kauban niini nga pulos na sila mga hubog.
Pag-abot sa General Maxilom ave., kalit lang nidagan si Jouie ug wa na sila masayod kon nakasakay ba kini o wala.
Samtang sila naglakaw, nakalitok si Jouie sa iyang kauban nga mag book siyag Angkas nga maoy iyang sakyan apan gibaliwala lang kini nila.
“Ingon siya nga naglakaw ra sila kay ang pananghid ni Jouie ana siya nga moadto sa siyag JY. Kato ato nga time hubog daw kaayo siya sa nga tanan. Nakakita siyag jeep nga nilabay, wala na daw siya kabantay kon nisakay ba si Jouie ato nga jeep nya nawala na dayon si Jouie,” matod ni Chiong.
CCTV
Sa maong impormasyon, matod ni Singson nga ilang subayon ang mga naka montar nga CCTV camera sa dapit aron masubay nila kon unsay nasakyan sa biktima.
Si Jocelyn nanawagan sa mga tawo nga nakakita sa iyang anak sa wa pa ma-missing niadtong Lunes nga tabangan sila aron mahatagan og hustisya ang kamatayon sa ilang anak.
“Manawagan lang unta ko kon kinsa to nakakita sa pagkuha sa akung anak. Basin nakit-an niya kinsa ang nagbuhat ma koan lang unta para naay lead ang mga pulis kay wala man guy lead, Sir,” matod ni Jocelyn sa interbyu sa Superbalita Cebu. (AYB)