PORMAL nga gisugdan niadtong Dominggo sa gabii ang 1st Tubo Master Construction and Services Basketball Tournament sa Barangay Basdiyot covered court, sa lungsod sa Moalboal.
Giorganisar sa presidente ug sa chief executive officer (CEO) sa TMCS Engr. Rodolfo Borja, ang tournament nga gidumala usab ni kanhi PBA player Renato Alforque commissioner Rey Canoy gisalmutan sa lima ka mga teams nga gilangkuban sa mga employado sa nagkalainlaing departamento sa maong buhatan.
Ang mga teams mao ang Beyond Island, Warehouse, Bamboo Ville, Garden Village ug Administration.
Sa opening game, nakaipsot ang Garden Village sa uwahing pagpanghudlat sa Beyond Island, 66-63. Si Raymund Deniga maoy nahimong best player of the game human kini mirehistro og 24 puntos. Samtang sa main game, ang Admin Department yanong milubong sa Bamboo Ville, 103-86.
Nangulo sa kadaugan si Paul Campana nga mipakatap og 24 puntos nga igo na kaayong nakapahimo niyang best player of the game.
Subay niini, si Borja mibutyag nga ang torneyo gitumong aron pagpalig-on sa camarederie sa mga empleyado ug ingon man paghatag kanila ug kahigayonan nga makalingaw-lingaw pinaagi sa sports.
Iyang gibutyag nga laraw sa management nga matag tuig ug mas modako-dako pa unya ang maong kalihukan.
Gawas sa mga tropeyo, ganting salapi ngadto sa mga mananaog ug ingon man nakahan-ay usab ang mga individual awards sa pagtiklop sa usa ka semanang kompetisyon. (JBM)