BISAN nasugamak sa laing kaplidihan ang Alaska Aces batok sa Magnolia Ang Pambansang Manok Hotshots, 95-90, niadtong Dominggo sa Araneta Coliseum, ang ilang coach nga si Jeffrey Cariaso adunay nakitang positibo sa pagpadayon sa ilang kampanya sa Philippine Basketball Association (PBA) Governor’s Cup conference.
Mao kini ang ikalimang sunodsunod nga kapildihan sa Aces sa samang gidaghanon nga mga duwa apan mao sab kini ang duwa nga aduna unta’y dakong poruhan ang Aces nga makuha ang kadaugan.
“This was a positive step forward for us,” matod ni Cariaso. “You have to take the positive about what happened. If we continue staying disciplined, if we continue staying together no matter what happens, I think susunod na yung mga wins.”
Ang Aces ningbangon gikan sa 15 puntos nga pagkalubong unya nahudlat nila ang Pambansang Manok dihang nakaduol sila, 90-94, sa nahabiling 61 ka mga segundos sa pagpangulo sa ilang import nga si Franko House.
Apan sa himatyong mga segundos, ningbahar ang opensa sa Aces hinungdan nga nakaiskapo ang Pambansang Manok dala ang 3-1 nga rekord.
“When it’s a close game, and for you to have a chance down the stretch, you have to be able to be near perfect. Again with the mistakes that we made defensively, I think that really hurt us. Missed free throws, missed box-outs. Those things that all teams talk about all the time, we didn’t do well tonight,” dugang ni Cariaso.
“If we did that a little bit better, baka may chance kaming nanalo.”
Sa laing duwa niadtong Dominggo, gipanglampornas sa Meralco Bolts ang Phoenix Pulse Fuel Masters, 111-96.
Gipangulohan ni import Allen Durham ang Bolts pinaagi sa iyang 27 puntos ug 12 rebounds.
Ang Bolts ningsaka sa 3-1 nga rekord samtang ang Bolts natagak sa 1-4 nga baraha. (ESL)