PERSONAL nga gidunol ni Philippine Sports Commission (PSC) commissioner Ramon Fernandez ang cash prize sa Team Cebu City nga P2.5 million ngadto ni Cebu City Mayor Edgar Labella isip second place sa overall standing sa 2018 Batang Pinoy National Finals sa Baguio City.
Sa samang higayon, gibutyag usab ni Fernandez nga nakigpinirmahay na usab sila sa mayor sa Memorandum of Agreement kalabot sa pag-implementar sa mga lagda kon unsaon pag-disburse ang premyo diin ang katuyoan mao ang grassroots development programs sa dakbayan.
Laing umaabot nga P2.5 million nga cash award ang ihatag usab sa Cebu City isip second sa Batang Pinoy 2019 National Finals nga gipahigayon sa Puerto Princesa sa niaging Agusto.
Sa kinatibuk-ang ang Cebu City Sports Commission aduna nay P12.5M nga additional fund alang sa grassroots development program. Ang P10M cash gihatag usab sa niaging tuig human ang Cebu City maoy nahimong overall champion sa Philippines National Games sa 2018.
Laing gituki usab ni Fernandez ug Labella mao ang umaabot nga pag-construct sa P50M nga multi-purpose building nga ihatag sa PSC isip additional training facility sa Cebu City.
Laraw unta sa dakbayan mao nga anha sa Cebu City Sports Complex tukoron ang maong building, apan gisugyot ni konsehal Dondon Hontiveros nga adto na lang kini himuon sa duha ka ektaryang luna sa South Reclamation Properties nga maoy gigahin isip sports facilities.
Niini, gimandoan ni Labella si Hontiveros sa pagsugod na og trabaho kalabot niini.
Sa nasayran, pinaagi ni Fernandez, ang PSC mihatag og P50 M alang sa pagtukod og 3-storey nga multi-purpose training facility. (JBM)