KIDAPAWAN CITY -- Team leader sa mga Special Partisan Unit (Sparu) sa New People's Army (NPA) nisurender sa militar alas 8:00 sa buntag niadtong Dominggo.
Giila ang rebelde nga si Harold Adjiaton, 30, team leader sa Sparu ilawom sa Guerilla Front Committee 53 ug nagpuyo sa Barangay Balite, Magpet, North Cotabato.
Mitahan sa kaugalingon si Adjiaton sa puwersa sa 72nd Infantry Battalion, Philippine Army, nga gipangulohan ni Lieutenant Colonel Rey Alvarado.
Gumikan sa pagsurender ni Adjiaton, nailog sa militar ang gitaguan sa mga armas sa didto sa Matalam ug President Roxas sa maong probinsiya.
Una nang gi-istorya ni Alvarado ang pamilya ug mga paryente ni Adjiaton aron mosurender sa 72nd IB, dala ang iyang armas nga kalibre .45 nga pistola, mga bala ug granada.
Kahinumdoman nga unang nadakpan sa militar ang nangulo sa Guerilla Fron Committee 53 nga si Rachel Daguman-Cortez, alyas Kumander Jasmin, sa public market sa San Francisco, Agusan del Sur.
Ang grupo ni Kumander Jasmin naglihok sa bukiron nga bahin sa Arakan Valley Development Complex, Kidapawan City, Makilala sa probinsiya ug sa Davao del Sur.
Ang pagsurender ni Adjiaton ug pagkadakop kang Kumander Jasmin naka-apekto og dako sa liderato sa NPA sa probinsiya.
Gitakda nga makadawat og cash ug livelihood assistance gikan sa gobyerno si Adjiaton ilawom sa Enhanced Comprehensive Livelihood Integrated Program. (Edgar E. Fuerzas)