TIGBAK na nga miabot sa Southern Philippines Medical Center (SPMC) ang duha ka gituohang tulisan human giingong misukol sa kapulisan sa San Pedro Police Station alas 3:50 sa kaadlawon kagahapon, Oktubre 7, didto sa Emerald Street, Marfori Subdivision, Barangay 9-A, Poblacion, Davao City.
Ang duha ka suspek mao sila Rogelio Heducos Wenceslao, 29-anyos, ulitawo, residente sa New Loon, Mintal, Tugbok District, samtang ang usa ka kauban niini wala pa maila.
Sumala ni Police Major Melvin Joseph Violan, station commander sa San Pedro Police Station, nga nakadawat sila og report nga dunay gitulis sa Mabini Street, Barangay 9-A.
Gihulagway sa biktima nga 20-anyos nga gitionan siya og pusil sa duha ka lalaki nga nakasakay og itom nga Rusi nga motorsiklo ug gikuha ang pitaka sa biktima nga dunay P900 ug gilayong misibat ang mga suspek padung sa Marfori Subdivision.
Sa paspas nga pagresponde sa kapulisan ug mga opisyal sa Barangay 9-A, nakorner ang mga suspek apan wala sila mitahan sa awtoridad ug nasuta nga dunay dalang mga hinagiban, hinungdan nga napugos ang mga pulis nga iniyutralisa ang mga suspek.
Nadala pa sa SPMC ang mga nahisgutan, apan gideklara silang dead on arrival.
Nakuha sa posisyon sa mga dinakpan ang mga gamit sa biktima. Nakuha sab ang usa ka revolver nga pistola nga dunay upat ka mga buhing bala ug ang usa ka kutsilyo nga dunay gitas-on nga dose ka pulgada.
Nagbahad ang Davao City Police Office nga ila gayud iniyutralisa ang mga suspek ugaling mabutang na sa alanganin ang kinabuhi sa pulis diha sa usa ka lihetimo nga operasyon.