KINING pag-entrigo sa sweldo sa bana ngadto sa iyang asawa, kabahin na kana sa custom o tradisyon sa mga Filipino.
Sa dugay'ng panahon, natisok na sa panghunahuna sa karaang henerasiyon ug sa bag-ong kaliwat kining maong practice.
Gani, sa ubang nasud, labi na sa Asya, mao gihapon ang ilang custom. Ang bana mao kanunay ang ulo sa pamilya apan iyang sweldo ngadto kanunay i-intrigo sa asawa.
Apan, dunay daghang kaso diin ang bana mismo maoy mangunay sa paghupot sa iyang sweldo ug ang asawa igo lang mohangyo kon dunay panginahanglan nga paliton.
Gawas niining tradisiyon sa pag-intrigo og sweldo, magdependi pud usahay na sa sabot sa managtiayon.
Mausab lamang kining sistemaha o tradisiyon kon molusot ug mahimong balaod kining House Bill 4888 ni Kongresista Fidel Nograles sa segundo distrito sa Rizal.
Gusto ni Nograles paglapdan ang coverage sa Violence against Women and their Children Act of 2004.
Sa iyang katarungan, matod ni Nograles maisip nga economic abuse kon magdependi nalang kanunay ang bana o asawa, ug dili na makahimo og desisyon kon unsaon niini pagpalit sa iyang panginahanglan o gusto tungod kay gihikawan siya sa paghupot og kwarta.
Pagkakaron, minus o wala tingali kaso nga dunay nagreklamo tungod kay gihikawan og kwarta ang bana o asawa.
Kon mahimong kining balaod ni Nograles, seguro ta daghan na unyang kaso ug mga reklamo atong masagap sa bisan asang suok sa nasod. Alegre dinhi ang mga barangay o korte.
Duna ba gyuy panginahanglan nga iduso nato kining panghunahuna ni Nograles. Basin baya momugna hinuon kini og kasamok sa panimalay.
Matod sa maong kongresista, dunay mga bana nga gustong moreklamo apan nagpakahilum nalang kini tungod kay nahadlok nga mahibaw-an kon unsa siya ka under sa asawa.
Dunay bentaha apan duna say disbentaha aning balaodnon ni Nograles. Lisod nato usbon kining tradisiyon ug custom nga hangtod kay gitahod ug girespetohan sa pamilya.
Mas maayo tingali ang angay iduso ni Nograles nga himuong mandatory kining pagseminar sa magtiayon matag tuig kabahin sa family value aron mas molig-on pa ilang panag-uban.
Kon maghimo tag balaod kabahin sa katungod, labi na kon maglambigit ang magtiayon, dako kaayo nang lalis, kay ang matag usa moinsister gyud sa ilang katungod.
Apan, kon ipasantop nato ang tiunay nga responsibilidad sa managtiayon -- bana ug asawa, basi ug subay sa lagda sa Ginoo, nan, kining balaodnon ni Nograles wa na kinahanglana.