GITUBAG ni Misamis Oriental Bise Gobernador Jigjag Pelaez ang isyung aduna kini ghost employee lakip ang dili makita nga mga sakyanan kon asa ang tubil giingong moabot sa P600,000 sulod lang sa duha ka bulan.
Kini ang gipangkwestyon ni Sangguniang Panlalawigan Board Member Dexter Yasay ngadto sa bise gobernador human giingon niining dili makita ang unom ka mga regular nga empleyado nga gadawat sa sweldo.
Giingon niining kini nga mga empleyado ang kanhi mga trabahante sakop sa iyang igsuon ug kanhi bise gobernador, Joey Pelaez, ug daw sa iyang pagpungko wala na kini gipapahawa.
"Kita sa buhatan sa bise gobernador nangitag paagi nga makatabang sa Misamis Oriental isip ikaduhang opisyal mao ni ang gipangtrabaho sa atong empleyado. Naa ni sila nagsuroy-suroy para ma disseminate sa atong mga programa," matud ni Pelaez.
Giila kini ni Pelaez nga mao sila si Allan Fernandez, Mark Kenneth Montejo, Sherwin Caulin, Imee Torre, Jude John Batalla, ug Rodgelyn Condesa nga giingong kanhi sakop sa iyang igsuon nga wala niya gipapahawa.
Sa hisgotanan sab sa sakyanan, gitubag ni Bise Gobernador Pelaez ang mga sakyanan sama sa lima ka vehkulo ug upat ka mga motorsiklo.
"Kini nga mga sakyanan, sakyan sa akong mga staff. Kung maglakaw ko outside, uban akong mga sakyanan. Kanang uban hatod sa mga communication ug sa different LGU (local government unit), ug mag-monitor padayon sa atong adbokasya," matud ni Pelaez sa usa ka sibyaan sa radyo.
Kalabot sab sa pagkwestyon ni Yasay sa gasolina nga halos moabot og P586,000 sulod lang sa duha ka bulan, gipasabot ni Pelaez nga balayrunon pa kini sa kanhi administrasyon sa iyang igsuon.
Apan, gihagit niini si Yasay nga manumbong kung nakita niini adunay mga kasupakan siya nga nahimo.
"Kung aduna man kahiwian nga nakita si Board Member Yasay, manumbong na lang siya sa korte para makita nato sa tinoud ug dili nalang nati i-trial by publicity kay nahimo man kitang dautan ani. Kung tan-aw niya iyang comprehension nagamit lang sa usa ka sakyanan ang kana nga kantidad sa gasoline, klaro man kana nga paglabag sa anti-graft law di manumbong sa korte para makita ang tinoud," hagit ni Pelaez.