DAGHANG bana ang giingong uyon sa sugyot nga pag-amendar o pagpalapad sa Violence Against Women and Children (VAWC) Law basi sa natalang reklamo sa kapulisan ug sagad mga empleyado sa gobyerno.
Gibutyag ni Police Master Sergeant Cherry Reyes, sa Women and Children Protection Desk (WCPD) sa Police Station 3 (PS3) sa Agora, nga dunay ubay-ubay nga nagreklamong mga bana sa ilang buhatan tungod kay tua sa ilang asawa ang ilang ATM card.
Nagpaabot lang usab ang kapulisan nga hingpit na kining maduso ug maaprobahan aron nga masayod usab sila unsay matabang sa mga lalaki.
"Luoy pud sila. Kasagaran gyud sa mga lalaki mga in service. Katong naa sa gobyerno gatrabaho mas daghan sila kaysa mga private employee nga mga lalaki," matud ni Reyes.
Gidugang pa niini nga gireklamo sa mga bana ang ilang mga asawa dili para kasohan apan aron nga madungog usab ang ilang mga bahin nga duna sab silay mga panginahanglanon.
"Di man gyud sila more on kasohan ilang asawa. Ang ilaha lang kanang matagaan pud sila og higayon, madungog pud ang ilahang side nga sila ang gatrabaho. Naa pud silay personal na mga panginhanglanon -- ang daily fare, daily meal, uban pa mga extra, mga load. Mao pud nay nakita pud nato nga unta sabton pud sa partner," dugang pa.
Gibutyag usab niini nga sagad sa mga lalaki nagreklamo ilabi na nga wala na silay katungod nga moreklamo usab tungod niining Republic Act 9262.
Nasayran nga giduso ni Rizal Second District Representative Fidel Nograles ang bill nga mamahimo na nga kasohan ang mga asawa nga mo-hostage sa mga ATM cards sa ilang mga bana panahon nga mamahimo kining balaod.