HEPE sa Police Regional Office 7 mimando karon sa Balamban Police Station nga ablihan og balik ang imbestigasyon kalabot sa kamatayon sa 10-anyos nga batang lalake sa sulod sa sakyanan sa usa ka bombero niadtong Sabado sa hapon.
Sa sayo pa, si Police Major Christian Torres mipahibawo nga walay foul play nga nakita ang mga sakop sa Scene on the Crime Operation (SOCO) sa patayng lawas sa bata nga napalgan nga wala nay kinabuhi sa sulod sa sakyanan ni Fire Officer 1 Orland Paul Romero.
Apan si Police Brigadier General Debold Sinas Director sa PRO-7 mimando nga dili una sirad-an ang ilang imbestigasyon kalabot niini aron maklaro ang mga pangutana nganong nakasulod siya sa sakyanan.
Kini bisan pa man og mipahibawo na ang ginikanan sa bata nga dili na siya interesado nga moreklamo pa sa gidangatan sa iyang anak, ug gani mihukom na kini nga dili nalang ipaubos sa autopsy aron unta makita unsa gyuy gikamatyan sa bata.
“Sakto ka. Ire-open ang investigation. Gusto kase ng chief of police i-close na, kase according daw sa family dili na sila mo-complain,” matod ni Sinas.
Gipasabot ni General Sinas nga wala nila gi dali-dali ang imbestigasyon ug gihukman dayon nga walay tulubagon ang tag-iya sa awto tungod kay usa kini ka sakop sa Bureau of Fire Protection.
Gani iyang giawhag ang publiko nga kon si kinsa kadtong adunay kasayuran sa hitabo mahimong modangop sa iyang buhatan sa PRO- 7 o kaha sa hepe sa Cebu Provincial Police Office aron mahatagan nila kini’g dinalian nga pagtagad ug mahatagan og hustisya ang bata.
“If somebody could help us please, contact us, contact my office or contact my provincial director diha sa Cebu Provincial Police Office para matagaan natog hustisya ang bata,” dugang ni Sinas.
Gipasalig sa heneral nga dili nila ipublikar ang mohatag nilag kasayuran labot sa tinuod nga nahitabo kon kini sukwahi sa pamahayag sa tag-iya sa sakyanan.
Si Police Colonel Roderick Mariano, ang hepe sa CPPO, mimando sa Investigation and Detective Management Branch sa pag-coordinate sa Balamban Police Station.
Apan sa pagkakaron magpaabot lang una siya sa resulta sa imbestigasyon sa iyang chief of police sa Balamban.
Usa sa ilang gustong masayran giunsa sa pag sulod sa bata sa sakyanan ug nganong wala kini makagawas.
Una nang gibutyag ni FO1 Romero nga wala siya makabantay nga adunay misulod sa iyang awto.
Giingon nga mo-automatic lock ang iyang sakyanan inig abot niini sa 10 minutos ug dako ang posibilidad nga misulod ang bata sa wala pa kini ma-lock.