GAWAS nga 80 rounds total ang na sparring, 95 porsyento nasab nga andam si Davaoeño reigning International Boxing Federation (IBF) Super Flyweight Champion “Pretty Boy” Jerwin Juntilla Ancajas.
Si Ancajas nga sakop sa Manny Pacquiao (MP) Promotions modepensa sa iyang bakus batok ni Méxican challenger “Titan” Jonathan Rodriguez karong Nobyembre 2, 2019 Sabado (Domingo sa buntag Philippine time) sa Dignity Health Sports Park sa Carson, California, USA.
“Nasa peak na po kami 95 percent na, pababa na po ang training namin ni Jerwin (Ancajas)” matod ni coach Joven Jimenez ang trainer/manager ni Ancajas nga nahinabi sa Superbalita Cebu.
Ang lumad nga taga Banana Capital of the Philippines o Panabo City, Davao del Norte nga si Ancajas adunay (31-1-2, 21KO) sa ikawalo nga higayon depensaan iyang bakus batok ni San Luis Potosí, Mexico’s pride Rodriguez nga moparada sa rekord (21-1, 15 KO).
Subra na sa duha ka buwan sa training si Ancajas sulod sa Naval Education Training Command (NETC) Zambales, Philippines diin matod ni Jimenez nga 125 pounds na sa timbang apan magpa reduce na sila ngadto sa 115-lb nga kaya kaayo makuha sa iyang walhon, mapahiubsanon ug loyal nga boxer.
Sa Oktubre 18 mobiya sa Pilipinas aron molupad sa US ang team Ancajas nga langkuban nila ni Jerwin, Joven, Fernando Parcon, Jeaneth Aro, Virgil Jimenez ug Todd Makelim.
Ang Ancajas vs Rodriguez 12-round 115-lb title fight maoy co-main event nila ni Mexican Miguel Berchelt batok American challenger Jason Sosa alang sa WBC Super Featherweight title nga gidalit sa Top Rank ni Bob Arum sa Top Rank Promotions nga isalida sa ESPN. (Daniel Quindao Guden, US Correspondent)