KATORSE anyos dihang gipusil-patay didto sa Sitio Banawa, Guadalupe, Cebu City niadtong Marso 7, ning tuiga. Dili tungod kay nakahimo siya og butang nga gikayugtan sa katilingban.
Apan tungod kay gitulis siya sa tulo ka mga walay kaluoy, walay Diyos, walay kalag nga mga mananap.
Padong siyang mopalit ug kamunggay nunot sa sugo sa iyang apohan. Apan mao na kadto ang iyang katapusan. Iyang gisuklan ang kamatayon apan human sa pipila ka oras, wa na siya makasugakod.
Batan-on. Buotan. Puno sa damgo. Puno sa kahibulong sa mga panghitabo sa kinabuhi. Sakristan sa Parish of the Alliance of Two Hearts sa Banawa ug second year high school.
Di makatuo ang iyang inahan nga patay na ang iyang anak. Daghan kanato nakurat ug nakapanglingolingo. Way usa kanato nga makapangahas pagpakaaron-ingnon nga atong natugkad ang kasakit nga bation sa usa ka inahan kansang anak namatay tungod sa Nokia 3310 nga nikantidad og P 500.
Gipusil siya samtang anaa kita ubos sa gun ban.
Nagpuyo si Carlo sa katilingban diin ang kinabuhi barato, diin ang mga kriminal wa mahadlok sa balaod, diin ang matag-usa magpanglingi kay wa makahibawo kung kinsa ang sunod nga biktima, diin daghan ang nidawat sa “lagda” nga swerti-swerti lang. Adunahan o kabus dili luwas sa kakuyaw.
Ang atong tubag sa kakuyaw mao ang pagtukod ug mga tag-as nga paril nga mohatag kanato ug ilusyon sa kalingkawasan.
Ugma – nunot sa atong pagpadayon sa atong pakigbugno sa tanan natong giatubang sa kinabuhi – daghan kanato ang malimot na ni Carlo, mahimo siyang tipik ug kabahin sa bugnaw nga statistika o numero sa mga biktima.
Hinaot nga ang iyang kamatayon makapapukwat sa atong mata sa kamatuoran nga tagsatagsa natong responsibilidad ang pagkab-ot sa usa ka malinawon ug hapsay nga katilingban. Panahon na usab nga himuon sa gobyerno ang tanan aron mokurog ang tuhod sa mga kriminal ning atong katilingban.
Nadakpan na ang mga kriminal. Apan patay na si Carlo. Hinaot nga ato kanunay isilsil sa atong alimpatakan nga ang iyang kamatayon nakahigot sa atong kinabuhi ug sa kinabuhi sa mga mahigugmaon sa kalinaw. Ikaw, ako ug si Carlo usa ra.
Nganong dili kita mogawas ngadto sa kadalanan, mogawas sa luwas natong nahimutangan, aron ipakita ang atong kasuko ug aron kita mosinggit: Sobra Na!
Tingali sa maong paagi mopahiyom si Carlo.
(birada_ruphil@yahoo.com)