ANG dugo sa amahan, di dugo sa anak. Kini ang kahimtang tali nila ni Mayor Socrates Fernandez ug sa iyang sinagop nga si Joavan. Apan ang amahanong pagbati sa mayor ngadto kang Joavan hagkot o latok pa sa espisong sikwate.

Kon magmahal ang tawo wa kini sukdanan. Kay bisag di nimo dugo, apan ikaw ang nagmatuto sa masuso pa moalimbukad o mobuklad gyud ang gugma sulod sa dughan.

"The Manny Pacquiao Blog". Click here for stories and updates on the Filipino boxing champ.

Sama na siya sa tinuod mong anak. Kini ang kamatuoran. Busa di kapugngan nga nagpakitag pagtagad si Soc ingon man sa paglaban kang Joavan bisan sa mga sala sa nauwahi.

Natural ang reaksiyon ni Soc isip amahan. Ang nakaapan lang, kay siya usa ka pulitiko ug mayor sa siyudad sa Talisay. Ang tanan diha sa maong siyudad nagbantay niya ug sa iyang pamilya. Kay kabtangan siya sa katawhan.

Sa gamayng sipyat sa ilang lihok mahibaw-an dayon. Unya, kay importante lagi nga tawo ang hitabo masumsoman dayon sa radio ug mabutang pa sa unang pahina sa mga mantalaan.

Anhi dinhi modako ang isyu. Imbes, langgos lang nahimo hinuong samad. Magkatawa ang iyang mga kaaway sa pulitika kay makapabor. Di na sila mangitag isyu batok sa mayor.

Di ikalimod nga lisod ang pagpangitag isyu batok kang Soc labi na sa pangurakot.

Maayong tawo ang mayor. Di sama sa kadaghanan sa mga pulitiko nga kurakot kaayo.

Sa dugayng panahon anaa siya nagbandilyo sa mga maayong pagtulon-an sa Dios isip Catholic faith defender. Sa ato pa, kanunayng nasilsil sa iyang hunahuna ang mga maayong mithi sa kinabuhi.

Ingon unta niini ang ubang mga pulitiko maninguha nga magpaduol sa Dios. Apan katol pa sila sa mga kuyamad nga angayng tusdon.

Kon magpaduol, pagpakaaron-ingnon lamang.

Di sad ko motuo nga si Soc nagpakaaron-ingnon lamang. Kadugay na sa panahon nga nabaniog ang iyang ngalan isip tigpanalipod batok sa mga mananaway sa Simbahang Katuliko dinhi sa ato.

Tungod niini bitaw, nabalikbalik siyang gipiling mayor sa Talisay. Di ko sad motuo nga tungod sa iyang anak mawala ang pagsalig sa mga tawo kaniya. Mga intelihente nga mga botante god ang mga Talisaynon.

Apan, husto si Msgr.Binghay nga nitambag nga aron ikapakita nga siya maayong amahan iyang disiplinahon si Joavan. Iyang ipa-rehabilitate kon kini adik. Patagmon sa bisan unsang paagi aron kini mausab. Dinhi motak-om na unya ang baba sa iyang mga kaaway.