MGA duwa karon
4:30 pm- Talk N’ Text batok NorthPort
6:45 pm- Rain or Shine batok Phoenix
Protektahan sa Talk N’ Text KaTropa ang ilang paggunit sa solong liderato sa ilang pagpakigbatok sa NorthPort Batang Pier sa premirong duwa karong gabii sa Philippine Basketball Association (PBA) Governor’s Cup conference sa Cuneta Astrodome.
Ang KaTropa kasamtangang nag-una sa standing nga adunay limpiyong 4-0 nga rekord samtang ang Batang Pier gikan sa tulo ka sunodsunod nga kapildihan nga nagpahagsa kanila sa 1-3 nga baraha.
Kon basihan ang rekord, dili ikalimod nga makonsiderar nga grabe ka inilog ang KaTropa ning maong sangkaa.
Apan nasayod si KaTropa coach Bong Ravena nga dili kini mao ang tiunay nga senaryo ug kon molugak sila og gamay hilabi na sa depensa, hayan delikadong mabulingan ang ilang rekord.
“Defense. We have to prevent our opponent from scoring more than 90 points.”
Sa miagi nilang duha ka mga duwa, nahudlat og insakto ang KaTropa una nila napukan ang ilang mga kontra nga mao ang Phoenix Pulse Fuel Masters, 123-118, ug Columbian Dyip, 125-120.
Ningdaog man tuod ang KaTropa apan wala nakauyon si Ravena sa gipakita sa iyang mga batos.
“Our last two games we were not good,” asoy ni Ravena. “We barely made it our last game. We cannot play like that on defense.”
Adunay mga unod ang gipangbatbat ni Ravena hilabi na ning kombatiha nga mibalik na’g duwa alang sa Batang Pier ang usa sa ilang mga sinaligan nga si Sean Anthony.
Si Anthony nakabalik na sa labing ulahing duwa sa Batang Pier ug nakatampo kini’g unom ka mga puntos ug walo ka rebounds sa ilang kapildihan batok sa Blackwater Elite, 107-98.
Apan gilauman nga sa pagdagan sa mga adlaw, mas magkakuyaw ang duwa ni Anthony nga maoy gihuwat sa Bayang Pier.
Sa main game, magsangka ang parehong nagsalimoang nga Rain or Shine Elasto Painters ug Phoenix Fuel Masters.
Ang Elasto Painters adunay 1-3 nga rekord samtang ang Fuel Masters naghupot og 1-4 nga rekord.
Ning sangkaa, parehong adunay pas-anon nga kalbaryo ang Elasto Painters ug Fuel Masters.
Dili makaduwa alang sa Elasto Painters gumikan kay naangol (groin) kini pagbalik sa miagi nilang duwa sa Elasto Painters.
“He’s out for at least two weeks yata,” matod ni RoS coach Caloy Garcia kabahin sa 37 anyos nga kanhi two-time MVP.
Dili sab makaduwa alang sa Fuel Masters ang usa sa ilang labing bato. (ESL)