DAGHAN ang nagtuo nga dunay kalabotan si PNP Chief Oscar Albayalde sa gitawag og ninja cops o kadtong mga sakop sa kapolisan nga mibaligya sa mga nasakmit nga mga druga, imbes i-report kini.
Kon paminawon ang mga pamahayag nila ni kanhi CIDG chief Benjamin Magalong, PDEA chief Aaron Aquino ug kanhi opisyal sa kapolisan nga si Oscar Gaerlan, klaro nga duna siyay kalambigitan, matod pa sa uban.
Apan dunay pangutana.
Kon naapil pa si Albayalde sa maong kalihokan, ngano nga na-promote pa man siya? Gani, natudlo pa man siya nga hepe sa PNP. Kon apil pa siya sa gitawag og ninja cops, dili na unta siya matudlo nga PNP chief.
•••
Dunay gitawag og vetting process ang PNP.
Pasabot, ukayon ang imong pagka-tawo, ang imong mga rekord, ang imong mga kaigsoonan, ukayon kini tanan. Tan-awon og wala bay mansa sa imong pagka-tawo nga sarang maka-apekto sa imong trabaho, labi na kay sensetibo ang maong posisyon.
Ang tanan nga nahitabo sa imong kinabuhi ukayon, mao kana ang gitawag og vetting.
Mao kini sagad buhaton sa tanan nga mo-apply og trabaho o magpa-promote sa posisyon sa kapolisan o kaha sa kusog militar.
•••
Kon gihimo pa kini sa sitwasyon ni Oscar Albayalde kaniadtong panahon nga naapil ang iyang pangalan sa mga kandidato sa pagka-hepe sa PNP, hayan nakita ang iyang rekord sa gitawag og drug sting sa Pampanga nga maoy nahimong unod sa testimonya nila ni Magalong, Aquino og Gaerlan.
Hayan nakita nga duna siya “kalabera” sa iyang rekord og segurado nga dili na siya itudlo pagka-hepe sa PNP.
Apan nganong natudlo man siya? Nagpasabot ba kini nga dula-dula lang ang vetting sa PNP? Gani, mapagarbohon si PRRD sa pagtudlo kang Albayalde kay matod pa, estrikto kini ug maayo pa og rekord.
•••
Daghang mga mayor ang nasina sa gihimo ni Yorme Isko Moreno sa dihang gihinloan niya ang mga kadalanan sa Manila.
Matod sa usa ka mayor sa usa ka siyudad, OA ra pod na si Isko. Segurado ko nga dili gyod na magsigi, maayo lang na sa sinugdanan.
Ang uban, igo lang mikatawa ug mibiay-biay ni Yorme kay matod pa nila, sureball gyod nga dili na modaog sa sunod nga piniliay si Yorme.
Apan mismo si PRRD naka-believe sa gihimo ni Yorme. Gani, kadaghan nga higayon kini niya nga gidayeg atubangan sa mga mayor sa tibuok nasod.
Tungod sa gihimo ni Yorme, nahimong ehemplo sa mga mayor ang siyudad sa Manila.
Walay nahimo ang mga mayor, napugos sila sa paglimpiyo sa mga kadalanan sa ilang lungsod tungod kay dunay mando sa DILG nga i-suspenso ang dili mosunod sa paghinlo sa kadalanan.
•••
Karong bag-o pa lang, dunay mando si Yorme nga bawal na ang magbaligya og second-hand nga mga cellphones sa Manila.
Matod pa, kasagaran sa mga gipamaligya mga kinawat.
Daghan ang nalipay, daghan sab ang nasuko.
Molampos kaha si Yorme sa iyang kampanya batok sa second-hand cellphones?