HATAGAN ni Mayor Edgardo Labella og mga consultant ug bag-ong mga sakyanan ang 18 ka mga konsehal sa Dakbayan sa Sugbo.
Ang pundo alang niini adto kuhaon sa 2020 annual budget.
Si Bise Mayor Michael Rama hatagan usab ni Labella og tulo ka consultants ug bag-ong sakyanan.
Si Labella niingon nga wa siyay gipili sa hatagan og benepisyo, kaalyado man o kaatbang sa partido, sanglit ang iyang panggobyerno di pareha sa niaging administrasyon.
“I will provide them consultants and provide vehicles. Unlike before nga hasta gani ko, wala ko tagai og vehicle,” padayag ni Labella.
Ang mayor nibutyag nga iyang gipapili og unsang klase sa mga sakyanan ang gusto sa matag konsehal.
Apan kon siya ang pabut-on, gusto niya kadtong pick-up vehicle nga 4x4 para makasaka sa mga barangay sa kabukiran para pagtunol sa batakang serbisyo.
Apan gipadayag ni Labella nga kadtong mga konsehal nga nagdawatan og transportation allowance balor og P8,500 matag buwan di na sila mamahimong mahatagan og bag-ong sakyanan sanglit mahimo sab silang manubag sa balaod.
Ang Office of the Mayor wala pa makaduso sa ilang proposed annual budget ngadto sa Sangguniang Panlungsod.
Apan posible nga sa mosunod nga mga semana, maduso na ang gipangayo nga budget para maaprobahan sa Konseho sa dili pa mahuman ang tuig.