MOABOT sa 160 ka mga pulis sa Mandaue City Police Office (MCPO) gipaubos sa kinalit nga drug test.
Atol sa pagbisita ug gipahigayon nga inspection sa National Police Commission (NAPOLCOM), gisusi ang mga armas, uniporme, mga gamit ingon man lisensya sa kapulisan.
Matod sa hepe sa MCPO, Police Colonel Jonathan Abella, nga gituyo niya nga itumong ang surprise drug test atol sa pagbisita sa Napolcom aron walay makaikyas.
Apan kon dunay dili mopatim-aw sa inspection ug surprise drug test, manubag kini sa Napolcom ug ipaubos sa imbestigasyon.
Hinuon, miagi na sa pipila ka kinalit nga drug test ang sakop sa City Intelligence Branch (CIB), apan negatibo ang resulta niini.
Kon duna may magpositibo, matod ni Abella nga hatagan hinuon kini og kahigayonan nga makahatag og katin-awan. Kon magpositibo, mag-atubang kini og kasong administratiba. Ang gipahigayon nga random drug test usa lang sa mga kalihukan sa kapulisan pagpalig-on sa internal cleansing.