GILANTAWAN nga dili mominos sa singko mil ka mga Talisaynon, mga turista ug bisita ang modagsa aron mosaksi sa pagbalik og saulog sa Halad Inasal Festival sa dakbayan sa Talisay.
Ang maong kalihukan ipahigayon karong Oktubre 13, adlawng Dominggo. Kini sukwahi sa naandan nga matag Oktubre 15, adlaw sa kapistahan kini ipasundayag.
Ang pagbalhin og sayo nga pitsa sa maong kalihukan gituyo ni Talisay City Mayor Gerald Anthony Gullas aron kalikayan ang paghuot sa trapiko ug paghatag og igong siguridad sa adlaw na unya sa kapistahan sa patron, Sta. Teresa de Avila.
Apan bisan sa pagbalhin sa adlaw sa festival, gipasabot ni Gullas nga mao gihapon kini ang usa sa major events sa kasaulogan sa fiesta.
Tungod sa himuon nga tunga sa adlaw nga street dancing ang Cebu South Coastal Road (CSCR) temporaryong dili paagi-an ug mga bus de pasahero-an gikan sa alas 12 sa udto ngadto na sa alas singko sa hapon karong Dominggo.
Sa Oktubre 15, 2019, adlawng Martes, gipaabot nga mohan-ok usab ang bul-og sa kabatan-onan tungod kay aduna may ipahigayon nga konsiyerto sa usa ka inila ug sikat nga banda sa Kaulohan nga mao ang Parokya ni Edgar.
Gibutyag ni Gullas nga permi nang andam ang Talisay City Police ug City of Talisay Traffic Operations Development Authority (CT-TODA) sa matag adlaw nga kalihukan. (FMD)