WALAY bisag usa ka empleyado sa Lapu-Lapu City hall nga nagpositibo sa gidiling drugas sa sunodsunod nga drug test sa kagamhanan ang miduol sa City of Lapu-Lapu Office of Substance Abuse and Prevention (C-Losap) alang sa pagpaubos unta sa rehabilitasyon.
Kini maoy gikompirmar ni Garry Lao, pangulo sa C-Losap) kinsa maoy gitahasan sa pagpa-rehab sa mga nag-positibo sa gidiling drugas.
Ang pagpa-rehabilitate nga modangat og unom ka buwan mao untay usa ka paagi nga posibleng mabalik sila sa pagpanerbisyo.
Kahinumdoman moabot sa 15 ka mga empleyado gikan sa nagkadaiyang departamento sa dakbayan ang nagpositibo sa sunod-sunod nga drug test sa milabayng mga semana.
Kini nagagikan sa City Disaster Risk Reduction and Management Office (CDRRMO), City Traffic Management System (CTMS) ug Material Recovery Facility (MRF).
Matod ni Lao nga sa dili pa ipaubos sa drug test ang mga empleyado pasabton gyud sila ni Lapu-Lapu City Mayor Junard “Ahong” Chan nga mahimong mopaubos sa rehabilitasyon kung magpositibo aron posibleng matagaan og laing kahigayonan sa pagpanerbisyo sa gobyerno.
Apan gumikan kay wala man gayuy niduol ni Lao o ba kaha nihangyo ni Chan hayan final na ang pagkataktak sa mga empleyado base sa termination order nga giluwatan ni Chan.
Posibleng nauwaw o ba kaha dili lang gayud ganahan mopaubos sa rehabilitasyon ang mga nagpositibo, sumala ni Lao.
Kung nisanong pa unta sa rehabilitasyon ang mga nagpositibo hayan kinahanglan silang ipaubos sa duha ka oras nga session matag Huwebes.
Human niini gikatakda silang ipaubos sa evaluation una pa posibleng tagaan ug kahigayonan nga makabalik sa trabaho.
“Job order baya sila so walay employee-employer relationship, so final and executory na, wa man gyuy nihangyo” matod ni Lao. (GCM)