NANGUNAY ang hepe sa Police Regional Office 7 pagsusi sa 297 ka mga bag-ong police nga mipaubos sa unom ka buwan nga sub-sub nga training sa Philippine National Police (PNP) Regional Training Center 7 sa lungsod sa Consolacion.
Kini aron pagsiguro nga walay mabiktima sa hazing sa mga police trainees ug wala usab sila gipangwarta sa mga instructor ug sa ilang mga upper class nga maoy mihawid sa ilang training.
Matod ni Police Brigadier General Debold Sinas, hepe sa kapulisan sa Central Visayas, nga iyang gi monitor ang dagan sa training sa maong mga bag-ong police aron dili mahitabo ang gikabalak-an sa mga kabanay niini nga mahisama sa mga kadete sa Philippine Military Academy diin adunay usa ang namatay.
Ang gitugot lang mao ang sub-sub nga physical exercises nga maoy angayan nga buhaton ubos sa PNP Training Center.
Kung makasala gyud ang usa kanila adunay ipatuman nga de merits o silot alang sa tanan ug ipaubos sila sa exercise.
“We don’t need a physical contact to impose discipline kay una pwede ra man ang demerits. Ikaduha we have the physical exercises,” pasabot ni Sinas.
Lakip sa ilang gipatuman nga silot sa mga makasala mao ang pag suspenso sa mga pribelehiyo sama sa dili pagtugot nga maka uli sa ilang balay nga gitawag nilag passes.
Usa sa ilang likayan ang nahitabo sa usa ka police trainee nga namatay niadtong 2015 sulod sa training camp sa lungsod sa Sibonga human kini makuryente.
Si Police Patrolman Christopher Ruiz Jr. nakabsan gyud sa kinabuhi human nakuryentehan sa gimontar nga live wire diin didto mosuong ang mga trainee.
Si Police Lieutenant Colonel Mario Cortes, ang Regional Training Director, mipasalig nga walay hazing nga mahitabo tungod kay hugot kining gidili ni PNP Chief General Oscar Albayalde.
“Zero tolerance po ang RTC-7 regarding sa hazing, hindi po natin tino tolerate yan and in fact kagagaling lang namin sa national police training institute kahapon at binigyang diin ng mahal na Chief PNP na walang lugar ang hazing o hazers sa training.” padayag Cortes.
Gihimakak usab niya nga adunay initiation sa mga bag-ong recruit sanglit ang labing taas nga exercise mao ang reception nga nagpasabot nga inig abot sa training school ipaubos dayon sa sub-sub nga exercise aron masukod unsa ka andam ang pang huna-huna sa mga trainees.
Gipasidan-an usab sila ni Sinas nga dili magpahaylo sa mga loan sharks sanglit mao kini ang usa sa hinungdan nga maputos sa utang ang usa ka police nga mo resulta na hinuon ngadto sa pagpangawkaw.
Si Police Patrolman James Alacida mipahibawo nga sukad sa duha ka buwan nga gipaubos sila sa training wala pa sila makasuway og physical contact gikan sa ilang mga trainor.
Gipahibawo ni Sinas nga tulo na ang mi-undang sa training human masuta nga aduna kini mga sakit nga dili na makaantos sa training.
Human sa inspection gisunod usab dayon ang traditional nga bodol fight sa tanang police. (AYB)