USA ako sa naglaum nga moubos diyutay ang rating ni Pangulong Rodrigo R. Duterte sa Pulse Asia survey.
Hinuon, bisan miubos ang rating sa pangulo, siya pa gihapon ang giilang most approved ug trusted nga opisyal sa nasud.
Ang survey, nga gihimo gikan Septiyembre 16 ngadto 22, nagpakita nga ang approval rating sa pangulo miubos sa siyete porsyento samtang ang iyang trust ratinG mikanaug sa onse porsiyento.
Sa maong resulta, 74 porsiyento lamang ang misalig sa pangulo samtang 78 porsiyento ang miapruba sa iyang performance sa ikatulong kwarter sa 2019.
Ang survey gihimo samtang naglusad og imbestigasyon ang Senado sa kontrobersyal nga pagbuhi sa mga kombiktado sa heinous crimes ug ang kalambigitan sa mga opisyales sa kapulisan sa negusyo sa ilegal nga druga.
Di nalang sa nato hisgutan dinhi ang rating sa uban nga mga opisyales sa gobyerno sama ni Vice President Leni Robredo ug mga Senador nga mitiurok sab ang rating.
Nganong miturok man ang rating sa pangulo? Siyempre, nakita sa mga Pinoy nga bisan pa man sa kaisog sa pangulo, apan wa gihapon nahadlok kaniya ang iyang mga sinaligan nga mga opisyales sa gobyerno.
Dako man gud kaayo ang atong pagtuo nga di na malambigit sa kurapsyon ang iyang mga pinili tungod kay, suma pa sa pangulo kaniadto, mga hinashasan ang iyang gibutang sa pwesto.
Laliman ka nga grabe kaayong nakatulisok ANG mga Pinoy sa milabay nga administrasyon tungod kay duna lagi kurapsyon, apan dugay na diay nangwarta ang mga mga sinaligan sa kasamtangan nga administrasyon.
Sikat nga opisina niini mao ang Bureau of Corrections (BuCor) pinaagi sa Good Conduct Time Allowance (GCTA) Law ug Philippine National Police (PNP) nga nalambigit sa pag-recycle sa nakompiska nga druga.
Kay nakatrabaho man ako sa gobyerno kaniadto, akong ipaambit nga wa mi laing tinguha mao ang pagtabang nga mahimong limpyo ang among opisina kay among gipuy-an ang 8 norms of conduct for public officials and employees.
Hinaut nga mao sab kini ang himuon sa mga empleyado sa kasamtangan nga administrasyon isip tabang sa pangulo.